پاکستان کے ابھرتے ہوئے نوجوان فاسٹ بالر حارث رؤف نے آسٹریلوی ٹی ٹوئنٹی لیگ بگ بیش میں نئی تاریخ رقم کرکے اپنے کامیاب مستقبل کی نوید سنادی۔

تفصیلات کے مطابق قومی فاسٹ بالر حارث رؤف کی بگ بیش لیگ میں شاندار کارکردگی کا سلسلہ جاری ہے اور وہ بگ بیش  لیگ میں تیز ترین 20 وکٹیں لینے والے بالر بن گئے ہیں۔

میلبرن اسٹارز کی نمائندگی کرنے والے حارث رؤف نے گذشتہ روز بگ بیش لیگ کے چیلنجر مقابلے میں سڈنی تھنڈر زکے خلاف 3 وکٹیں حاصل کرکے یہ کارنامہ انجام دیا۔

فاسٹ بالر نے مچل اسٹارک کا 10 اننگز میں 20 وکٹیں حاصل کرنے کا ریکارڈ توڑتے  ہوئے محض 9 اننگز میں 20 وکٹیں حاصل  کرکے بگ بیش لیگ  کی ریکارڈ بک میں اپنا نام درج کروالیا۔

خیال رہے کہ حارث رؤف کا ستارہ ان دنوں عروج پر ہے  اور پاکستان نے لے کر آسٹریلیا تک ان کی تیز اور خطرناک بالنگ کے چرچے ہیں۔وہ بگ بیش لیگ میں ہیٹ ٹرک کرنے والے واحد پاکستانی بالر ہیں۔

سڈنی تھنڈرز کے خلاف  ہی گروپ میچ میں انہوں نے اپنے آخری اوور میں یکے بعد دیگرے تین وکٹیں حاصل کرکے ہیٹ ٹرک مکمل کی تھی۔

لیگ میں  عمدہ کارکردگی دکھانے پر حارث رؤف کو ’بگ بیش ٹیم آف دی ٹورنامنٹ ‘میں  بھی شامل  کیا گیا  ہے۔

صرف یہی نہیں بلکہ بگ بیش میں شاندار کارکردگی کے سبب انہیں بنگلہ دیش کے خلاف ٹی ٹوئنٹی سیریز کے لیے پہلی مرتبہ قومی ٹیم میں   بھی شامل کیاگیا تھا۔

واضح رہے کہ گذشتہ برس پاکستان سپر لیگ  میں لاہور قلندرز کی نمائندگی کرنے سے پہلےحارث رؤف ٹیپ بال کرکٹ کھیلا کرتے تھےاور انہوں نے کبھی ہارڈ بال کرکٹ نہیں کھیلی تھی۔

تاہم پی ایس ایل میں عمدہ کارکردگی کے سبب بگ بیش کی ٹیم میلبرن اسٹارز نے ان سے معاہدہ کیا جو ان کے لیے خوش قسمت ثابت ہوا اور وہ اپنے کیریئر کی ابتداء میں ہی عروج پر پہنچ گئے۔