برطانیہ کے نئے وزیر اعظم رشی سونک کا چہرہ بھارتی کرکٹر اشیش نہرا سے بہت ملتا ہے۔

سوشل میڈیا صارفین نے لاعلمی میں برطانوی وزیر اعظم رشی سونک کی جگہ بھارتی کرکٹر اشیش نہرا کو مبارکباد دینا شروع کردیں۔

کئی صارفین نے اشیش نہرا کی تصویر شیئر کرتے ہوئے انہیں رشی سونک قرار دیا تو کئی صارفین نے دونوں کی تصویر شیئر کرتے ہوئے اصلی رشی سونک کے بارے میں پوچھا۔

ریتو شری نامی صارفہ نے اشیش نہرا اور ویرات کوہلی کے پچپن کی تصویر شیئر کرتے ہوئے مزاقیہ انداز میں لکھا کہ ’برطانیہ کے نئے وزیر اعظم رشی سونک نوجوان ویرات کوہلی کو ایوارڈ دے رہے ہیں جب کہ حسد کرنے والے کہیں گے یہ اشیش نہرا ہیں‘۔

دوسری جانب برطانوی وزیر اعظم رشی سونک کو اشیش نہرا قرار دینے پر پاکستانی صارفین نے بھی حیرت کا اظہار کیا ہے جب کہ کئی دلچسپ ٹوئٹس بھی سامنے آئے ہیں۔

شیراز حسن نامی صارف نے لکھا کہ ’اشیش نہرا برطانیہ کے وزیر اعظم بن گئے اور کسی نے بتایا ہی نہیں‘۔

واضح رہے کہ 42 سالہ رشی سونک 24 اکتوبر کو کنزرویٹو پارٹی کے سربراہ منتخب ہوئے تھے جس کے بعد یہ واضح ہوگیا تھا کہ وہ برطانیہ کے نئے وزیر اعظم ہوں گے۔

آج انہوں نے برطانیہ کے بادشاہ چارلس سوم سے مکنگھم پیلس میں ملاقات کی، جس کے بعد وزیراعظم آفس ٹین ڈاؤننگ اسٹریٹ کے باہر پریس کانفرنس بھی کی ہے۔

اس ملاقات کے حوالے سے شاہی خاندان کے ٹوئٹر ہینڈل سے بتایا گیا ہے کہ ’بادشاہ نے رشی سونک کو نئی انتظامیہ بنانے کی دعوت دی جو انہوں نے قبول کرلی‘۔