راولپنڈی: پاکستان کے خلاف ٹیسٹ سیریز میں تاریخی فتح پر بنگلادیش کے کپتان نجم الحسن شنتو خوشی سے نہال ہوگئے۔

پاکستان اور بنگلادیش کی ٹیموں کے درمیان پنڈی اسٹیڈیم میں دو ٹیسٹ میچز پر مشتمل سیریز کھیلی گئی جس میں پاکستان کو بدترین شکست کا سامنا کرنا پڑا۔

پہلے میچ میں بنگلادیش نے 10 وکٹوں سے شکست دی تھی جب کہ دوسرے میچ میں بنگال ٹائیگرز نے 6 وکٹوں سے کامیابی اپنے نام کی۔

جیت کے بعد بنگلادیش کے کپتان نجم الحسن شنتو کا کہنا ہے کہ جیت پر بہت خوشی ہے، سیریز میں ہمارے فاسٹ بولرز نے شاندار کارکردگی کا مظاہرہ کیا۔

نجم الحسن شنتو کہتے ہیں کہ جیت کا سہرا تمام کرکٹرز کو جاتا ہے، مہدی حسن میراز محنتی کرکٹر ہیں جب کہ مہدی حسن میراز تسلسل کے ساتھ اچھی کارکردگی دے رہے ہیں۔

دوسری جانب عبرتناک شکست پر قومی ٹیم کے کپتان شان مسعود کا کہنا ہے کہ شکست پر بہت مایوسی ہوئی ہے، ٹیسٹ کرکٹ میں بولر اور بیٹرز کے لیے فٹنس بہت اہم ہوتی ہے۔

شان مسعود نے کہا کہ بولنگ میں بہتری کی ضرورت ہے، ٹیم نے پچھلی ناکامیوں سے کچھ نہیں سیکھا جب کہ ہمارے پاس اچھے مواقع تھے۔

کپتان شان مسعود مزید کہتے ہیں کہ ہم ہوم سیریز کے لیے پُرچوش تھے مگر اس سیریز کا نتیجہ بھی آسٹریلیا کی سیریز کی طرح ہی نکلا۔