قومی اسمبلی کی قائمہ کمیٹی کو وزارت انفارمیشن ٹیکنالوجی  حکام نے بتایا کہ سرکاری ملازمین کو دفاتر میں سوشل میڈیا، واٹس  ایپ اور یوایس بی کے کسی بھی قسم کے استعمال سے روک دیا ہے اور اب سوشل میڈیا پر پارٹ ٹائم کاروبار بھی نہیں کرسکتے۔

قومی اسمبلی کی قائمہ کمیٹی برائے انفارمیشن ٹیکنالوجی کا اجلاس علی خان جدون کی زیر صدارت ہوا جہاں انفارمیشن ٹیکنالوجی کی وزارت کےعہدیداروں نے بریفنگ دی۔

وزارت انفارمیشن ٹیکنالوجی کے نمائندوں نے بریفنگ دیتے ہوے بتایا کہ سرکاری دفاتر میں اب سے کوئی ملازم واٹس اپ یا سوشل میڈیا استعمال نہیں کرے گا اور آنے والے دنوں میں سرکاری اداروں میں یو ٹیوب ، فیس بک اور یوایس بی کے استعمال پر پابندی عائد ہوگی۔

انہوں نے مزید بتایا کہ دفتر میں لوگ یو ٹیوب اور فیس بک چلا رہے ہوتے ہیں،واٹس  ایپ استعمال کررہے ہوتے ہیں اور یو ایس بی کے ذریعے سرکاری فائلز کو گھ لے جاتے ہیں لیکن اب ڈیٹا کو سینٹرلائزڈ کر کے ان تمام سرگرمیوں پر پابندی عائد کردیں گے۔

ان کا مزی کہنا تھا کہ حکومت پاکستان وٹس ایپ کی طرز کا سرور بناِئے گی جو ملازمین پیغام رسانی کے لئے استعمال کرپائیں گے۔

وزارت انفارمیشن ٹیکنالوجی کے نمائندوں کا مزید کہنا تھا کہ ای آفس کو نادرا، ایس ای سی پی ،ایف بی آر اور دیگر اداروں سے منسلک کر دیں گے۔