ایک نئی اسمارٹ فون ایپلی کیشن جو صارفین کو مفت ڈیجیٹل اوتار بنا کر دے رہی ہے دراصل فیشل ری کاگنیشن معیار کی تصاویر لے رہی ہے اور ان کو ماسکو بھیج رہی ہے۔

اس ایپلی کیشن کی وجہ سے سائبر سیکیورٹی کمیونٹی میں بڑے پیمانے پر تشویش کی لہر دوڑ گئی ہے۔

ہزاروں لوگ اس نیو پروفائل پِک ایپلی کیشن سے مفت اوتار بنا کر سرورز پر اپنی تصاویر پہلے ہی اپ لوڈ کر چکے ہیں۔

تاہم، کئی افراد اس بات سے نا آشنا ہوں گے کہ اس ایپ کے پشت پر موجود کمپنی لائن راک انویسٹمنٹ ایک اپارٹمنٹ میں قائم ہے جو روس کی وزارتِ دفاع کے پڑوس میں ہے اور ریڈ اسکوائر سے صرف تین میل کے فاصلے پر ہے۔

ای سیٹ انٹرنیٹ سیکیورٹی کے گلوبل سائبر سیکیورٹی ایڈوائزر جیک مُور کا کہنا تھا کہ لوگوں کو تصاویر اور نجی معلومات نئی ویب سائٹ پر ڈالتے ہوئے انتہائی احتیاط برتنی چاہیئے۔

انہوں نے کہا کہ یہ ایپ لوگوں کے چہروں کو ہائی ریزولوشن میں عکس بند کرتی ہے۔

انہوں نے کسی بھی ایپ کی جانب سے اس مقدار میں ڈیٹا کی طلب پر سوال اٹھایا، بالخصوص ایسی ایپ پر جو مشہور و معروف نہیں کسی دوسرے ملک میں قائم ہے۔