کراچی میں متوقع ہیٹ ویو اور بحیرہ عرب میں سمندری طوفان کے معاملے پر کے ایم سی کی جانب سے الرٹ جاری کردیا گیا ہے۔
محکمہ موسمیات کی جانب سے تمام ضلعی ایڈمنسٹریٹرز کو سمندری طوفان کے باعث ہر طرح کے حفاظتی انتظامات کرنے کی ہدایات جاری کر دی گئی ہیں۔
کے ایم سی کی جانب سے تمام سائن بورڈز اور بل بورڈز کو فوری ہٹانے کا حکم دے دیا گیا ہے۔کسی بھی جانی و مالی نقصانات سے بچنے کے لیے تمام سائن بورڈز ہٹانے ہوں گے ، ناکامی کی صورت میں ہونے والے نقصانات کے ذمہ دار اشتہار ی بورڈز کے مالکان ہوں گے۔
ایڈمنسٹریٹر کراچی لئیق احمد کا کہنا ہے کہ متوقع ہیٹ ویو اور سمندری طوفان کی آمد کے پیش نظر ایمرجنسی نافذ کی گئی ہے۔ تمام اسپتالوں میں ڈاکٹر ز اور پیرا میڈیکل اسٹاف کی ہمہ وقت موجودگی کو یقینی بنایا جائے ۔
لئیق احمد کا کہنا ہے کہ فائر بریگیڈ، ریسکیو یونٹ، سٹی وارڈنز، محکمہ باغات، اور میونسپل سروس میں بھی 20 مئی تک ایمرجنسی نافذ رہے گی۔
انہوں نے اپیل کی ہے کہ شہری ہیٹ ویو اور متوقع سمندری طوفان کے پیش نظر احتیاطی تدابیر اختیار کرتے ہوئے اگلے تین دنوں تک گھروں میں رہنے کو ترجیح دیں۔
ایڈمنسٹریٹر کراچی نے کہا ہے کہ اگلے تین دنوں میں کراچی کا درجہ حرارت بڑھنے کا امکان ہے جبکہ متوقع سمندری طوفان کے باعث تیز ہوائیں چلنے اور بارش کا بھی امکان ہے۔
لئیق احمد کا مزید کہنا ہے کہ تیز ہواؤں کے باعث چھتیں اڑنے، سائن بورڈ گرنے اور کچی تعمیرات کے منہدم ہونے کے بھی امکانات ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News