لبنانی ملیشیا حزب اللہ کے سربراہ حسن نصراللہ نے شام میں اپنے جنگجوؤں کی تعداد کم کرنے کا اعلان کردیا ہے ۔

 غیر ملکی خبر رساں ادارے کے مطابق حز  ب اللہ کے زیر انتظام’’المنار‘‘سیٹلائیٹ ٹی وی چینل پر نشر ہونے والے خصوصی انٹرویو میں حسن نصراللہ نے شام میں اپنے جنگجوؤں کی تعداد کم کرنے سے متعلق سوال  کے جواب میں اس امرکی تصدیق کی  ہے  کہ ان کی تنظیم حزب اللہ  شام میں اپنا اثرونفوذ کم کرنا چاہتی ہے۔

ان کا کہنا تھا کہ حزب اللہ کا ہرجگہ موجود ہونا ضروری نہیں۔ حزب اللہ  کے جنگجوؤں کی تعداد میں کمی بیشی کی جا سکتی ہے۔

حسن نصراللہ نے کہا کہ شام میں بشارالاسد کی فوج نے اپنی گرفت مضبوط کرلی ہے۔ اس لیے اب حزب اللہ کا شام میں موجود اپنے جنگجوؤں کی تعداد کم کرنے میں کوئی حرج نہیں۔

ایران امریکہ جنگ کے حوالے  سے حسن نصر اللہ  کا کہنا تھا کہ    ایران اور امریکا کے درمیان جنگ چھڑنے کے بعد امریکی اتحادی اسرائیل’غیر  محفوظ ‘ہوجائے گا۔ ایران، اسرائیل پر پوری طاقت اور قوت سے بمباری کی صلاحیت رکھتا ہے۔

حسن نصراللہ نے امریکا کی طرف سے تنظیم سے وابستہ دو ارکان پارلیمنٹ پر پابندیوں کی شدید مذمت کرتے ہوئے کہا یہ پابندیاں دوطرفہ جنگ کا حصہ ہیں۔

 واضح  رہے کہ حسن نصر اللہ کا یہ تبصرہ ایک ایسے وقت میں سامنے آیا ہے جب امریکا اور ایران کے درمیان کشیدگی عروج پر ہے اور امریکی صدر ڈونلڈ ٹرمپ نے اسلامی جمہوریہ  ایران کے خلاف لفظی جنگ کو مزید ہوا دے رکھی ہے۔