افغانستان کی طالبان عبوری حکومت نے امریکا کو9 ارب ڈالرز کے منجمد اثاثے بحال نہ کیے جانے پر  ہجرت کی بڑی لہر کی وارننگ دےدی۔

طالبان عبوری حکومت کے وزیر خارجہ وکیل امیر خان متقی نے امریکی کانگریس کے نام کھُلے مراسلے میں کہا کہ امریکاکا افغانستان کے بینک اکاونٹس کو منجمد کرنا کسی بھی مسئلے کو حل نہیں کر سکے گا۔ امریکہ کا یہ فیصلہ دوحا سمجھوتے کی خلاف ورزی ہے۔

متقی نے کہا کہ افغان عوام ملک میں سالوں سے جاری جنگ کے بعد آخر کار محفوظ ماحول میں ہیں لیکن اس وقت عوام کے اصل اندیشہ ’امریکاکی طرف سے ملکی اثاثوں پر عائد کی گئی‘ پابندیاں ہیں۔

انہوں نے کہا کہ ہم،امریکاسے مطالبہ کرتے ہیں کہ افغانستان کے اثاثوں کو آزاد کیا جائے بصورت دیگر افغان عوام اور حکومت مشکلات کا شکار ہو جائیں گے۔ افغانستان میں حالات کا بدستور اسی شکل میں جاری رہنا علاقے اور دنیا میں ہجرت کی ایک بڑی لہر کا سبب بنے گا اور یہ دنیا کے لئے انسانی و اقتصادی بحران ثابت ہو گا۔

مراسلے میں متقی نے کہاکہ افغانستان کے اثاثوں کے انجماد اور اقتصادی پابندیوں نے صحت، تعلیم اور دیگر عوامی خدمات پر منفی اثرات مرتب کئے ہیں اور یہ چیز افغان عوام کو نقصان پہنچا رہی ہے۔

واضح رہے حال ہی میں سامنے آنے والی رپورٹ کے مطابق پانچ ہزار افغان روزانہ غیر قانونی طریقے سے ایران پہنچ رہے ہیں  اور اگست سے اب تک تین لاکھ افراد ایران جاچکے ہیں۔

30 لاکھ سے زائد افغان مہاجرین ایران میں جبکہ 15لاکھ مہاجرین پاکستان میں پہلے سے ہی موجود ہیں۔