اسرائیلی صدر ہرزوگ  نے آئندہ ہفتے متحدہ عرب امارات کے تاریخی دورے کا اعلان کیا ہے۔

اسرائیلی میڈیا کی رپورٹ کے مطابق  صدر ہرزوگ اتوار کو  ولی عہد شیخ محمد بن زید النہیان کی دعوت پر متحدہ عرب امارات جائیں گے، جو کسی  بھی اسرائیلی صدر کا خلیجی ریاست کا پہلا سرکاری دورہ ہوگا۔

اسرائیلی صدر اپنے دورے کے دوران شیخ محمد بن زید، یو اے ای کے امور خارجہ اور بین الاقوامی تعاون کے وزیر شیخ عبداللہ بن زید، دبئی کے حکمران وزیر اعظم شیخ محمد بن راشد المکتوم، اعلیٰ سرکاری حکام اور یہودی برادری کے افراد سے ملاقات کریں گے۔

رپورٹ میں مزید کہا گیا ہے کہ وہ پیر کو دبئی ایکسپو 2020 میں اسرائیل کے قومی دن کا افتتاح بھی کریں گے۔

ہرزوگ نے ​​منگل کو  اپنے ایک بیان میں کہا کہ  ہمیں یہ اعزاز حاصل ہے کہ ہم کسی اسرائیلی صدر کا متحدہ عرب امارات کا پہلا دورہ کر کے تاریخ رقم کرنے جارہے ہیں۔

انہوں نے مزید کہا کہ یہ اہم دورہ ایسے وقت میں ہے جب اسرائیلی اور اماراتی اقوام ایک نئے مشترکہ مستقبل کی بنیاد ڈالنے میں مصروف ہیں۔

اسرائیلی صدر کا کہنا ہے کہ مجھے یقین ہے کہ ہماری جرات مندانہ نئی شراکت داری مشرق وسطیٰ کو بدل دے گی اور پورے خطے کو متاثر کرے گی۔

ہرزوگ نے کہا کہ ہم ایک امن پسند قوم ہیں  اور ہم مل کر ’ابراہم معاہدے ‘کے امن کے تاریخی دائرے کو وسعت دیں گے اور اپنے بچوں کے لیے ایک بہتر، زیادہ روادار  اور محفوظ دنیا بنائیں گے۔