اطالوی کوسٹ گارڈ نے فلمی انداز میں ایک ہزار سے زائد تارکین  وطن کو ریسکیو کرلیا۔

بین الاقوامی خبر رساں ادارے کے مطابق اطالوی کوسٹ گارڈ نے تارکین وطن کو بچانے کے لیے سمندر میں ریسکیو آپریشن کرتے ہوئے فلمی انداز میں ایک ہزار سے زائد افراد کو بچا لیا۔

یہ بھی پڑھیں: اٹلی میں تارکین وطن کی کشتی ڈوب گئی، 28 پاکستانیوں سمیت 59 افراد جاں بحق

اطالوی کوسٹ گارڈ نے کلابریا کے علاقے میں کشتیوں میں سوار سیکڑوں پناہ گزینوں کو بچانے کے لیے متعدد امدادی کارروائیاں شروع کر رکھی ہیں۔

ایک اندازے کے مطابق اٹلی کے ساحل پر اب بھی ایک ہزار 300 افراد خطرے میں ہیں۔

اطالوی وزارت داخلہ کا کہنا ہے کہ ان کارروائیوں کا آغاز اٹلی کے پناہ گزینوں کی سمندری بچاؤ کی صلاحیتوں کی جانچ پڑتال کرنا ہے۔

کوسٹ گارڈ   حکام نے ایک بیان میں کہا کہ بچاؤ کی کارروائیاں بہت پیچیدہ ہیں کیوں کہ جن کشتیوں پر بڑی تعداد میں لوگ سوار  ہیں وہ سمندر میں ادھر ادھر بہتی جا رہی ہیں۔

کوسٹ گارڈ کے جہاز ایک کشتی پر سوار 500 افراد کو بچانے کے لیے روانہ کیے گئے تھے۔  کلابریا سے تقریباً 160 کلومیٹر دور مشکل میں گرفتار دو مزید کشتیوں پر 800 افراد کو بچانے کے لیے بھی دیگر جہاز بھیجے گئے تھے۔

اس وقت مجموعی طور پر تین کشتیوں پر سوار تارکین وطن کو بچانے کی کوشش کی جا رہی ہے۔ کوسٹ گارڈ نے بحریہ کی پیٹرول بوٹ سے اضافی مدد طلب کر لی ہے۔

یہ بھی پڑھیں: اٹلی کشتی حادثہ: قومی ویمن ہاکی کھلاڑی شاہدہ رضا بھی جاں بحق

اطالوی وزارت داخلہ کا کہنا ہے کہ  فوجی جہاز مطلوبہ امداد کے لیے روانہ ہو چکا ہے۔

واضح رہے کہ    دو ہفتے قبل ہی اٹلی کے ساحل پر ایک کشتی تباہ ہونے کی وجہ سے کم از کم 73 افراد ڈوب کر مر گئے تھے۔ کشتی میں پاکستانی تارکین وطن بھی سوار تھے۔