اسلام آباد: حکومت پاکستان نے نوجوانوں کی ترقی کے لیے ایک بڑا قدم اٹھاتے ہوئے وزیراعظم ڈیجیٹل یوتھ ہب لانچ کرنے کا اعلان کردیا۔
ڈیجیٹل یوتھ ہب کا منصوبہ پرائم منسٹرز یوتھ پروگرام کے تحت شروع کیا گیا ہے جس کا مقصد نوجوانوں کو تعلیمی، پیشہ ورانہ اور کاروباری مواقع ایک ہی پلیٹ فارم پر فراہم کرنا ہے۔
ڈیجیٹل یوتھ ہب کے ذریعے نوکریوں، اسکالرشپس، مہارتوں کی تربیت اور کاروباری قرضوں سمیت مختلف سہولتیں دی جائیں گی۔
حکومت نے کاروبار کے خواہشمند نوجوانوں کے لیے لون اسکیم کے تحت آسان شرائط پر قرضوں کی فراہمی کو بھی اس منصوبے میں شامل کیا ہے۔
اس کے علاوہ بیرون ملک جانے والے نوجوانوں کو مالی معاونت فراہم کرنے کا بھی فیصلہ کیا گیا ہے تاکہ وہ اپنے کیریئر کو مزید بہتر بناسکیں۔
ڈیجیٹل یوتھ ہب کے تحت لیپ ٹاپ فار آل اسکیم کا آغاز بھی کیا جا رہا ہے جس کے تحت نوجوانوں کو آسان اقساط اور بلا سود قرضوں پر لیپ ٹاپ فراہم کیے جائیں گے۔
