مشیر خزانہ عبدالحفیظ شیخ کا کہنا ہے کہ خطے کی ترقی کے لیے مواصلات اور رابطے بڑھانا ضروری ہے۔

انہوں نے یہ بات اسلام آباد میں ایک سیمینار سے  خطاب میں کہی ۔

انہوں نے اپنے خطاب میں کہا کہ تمام مالیاتی ادارے پاکستان کے ساتھ اشتراک چاہتے ہیں۔خطے کی ترقی کے لیے مواصلات اور رابطے بڑھانا ضروری ہے۔

انہوں نے کہا کہ ترقی ہوگی تو روزگار بڑھے گا۔ کیپیٹل مارکیٹ نجی شعبے کی مالیاتی ضروریات کے لیے اہم ہ۔، پاکستان چاہتا ہے کہ کیپیٹل مارکیٹ ترقی کرے۔ریگولیشن بہتر بنا کر کیپیٹل مارکیٹ میں شفافیت بڑھائی جاسکتی ہے۔

ان کا کہنا تھا کہ پاکستان میں بیرونی سرمایہ کاروں کے لیے ماحول سازگار ہے۔ متعدد شعبوں میں سرمایہ کاری کے بہترین مواقع موجود ہیں۔ خصوصی اقتصادی زونز تیار ہورہے ہیں۔ پاکستانیوں کو سی پیک سے بھرپور فائدہ اٹھانا چاہیے۔

مشیر خزانہ نے مزید کہا کہ موجودہ حکومت کو قرض کا بڑا بوجھ ورثے میں ملا۔ پاکستان نے پیغام دے دیا کہ معاشی نظم وضبط قائم کرے گا، تمام مالیاتی ادارے پاکستان کے ساتھ اشتراک چاہتے ہیں۔

انہوں نے کہا کہ آئی ایم ایف کے پروگرام میں 6ارب ڈالر کی اہمیت نہیں ہے۔ اہمیت صرف دنیا کی طرف سے پاکستان پر اعتماد کی ہے۔ پاکستان کے آئی ایم ایف کے پروگرام میں جانے سے مثبت معیشت کا تاثر گیا۔ اسلامی ترقیاتی بینک، عالمی بینک اور ایشیائی ترقیاتی بینک فنڈز بڑھانا چاہتے ہیں۔