وفاقی وزیرخزانہ محمد اورنگزیب نے عوام کو بڑی خوشخبری سنادی ہے۔

وفاقی وزیرخزانہ محمد اورنگزیب نے واشنگٹن میں امریکی تھنک ٹینک سے گفتگو کرتے ہوئے کہا کہ حکومت نے ابھی آئی ایم ایف کے ساتھ بات چیت کا آغاز کیا ہے اور اس پروگرام کی شکلوں پر اتفاق اور عمل درآمد ہونا باقی ہے۔

انہوں نے کہا کہ حکومت آئی ایم ایف کے ایک بڑے بیل آؤٹ پیکج کو جلد از جلد حتمی شکل دینے کی کوشش کر رہی ہے تاکہ پاکستان کی معیشت کو بحال کیا جا سکے، امید ہے جلد نیا معاہدہ ہوجائے گا۔

محمداورنگزیب نے کہا کہ ایف بی آر اور ٹیکس کلیکشن نظام میں ضروری اصلاحات کی جارہی ہیں، زیادہ سے زیادہ لوگوں کو ٹیکس نیٹ میں لانے کی ضرورت ہے۔

وفاقی وزیرخزانہ نے کہا کہ پاکستان آمد پر آئی ایم ایف مشن سے مذاکرات تعمیری رہے، معاشی پالیسیوں میں تسلسل ضروری ہے، ہمیں اسٹرکچرل اصلاحات کے لیے 2 سے 3 سال لگیں گے۔

انہوں نے کہا کہ ٹیکس نظام میں ٹیکنالوجی کے استعمال پر غور جاری ہے، ٹیکس نظام میں شفافیت کیلئے ڈیجیٹیلائزیشن ضروری ہے، ہمیں اپنے اخراجات کو کم کرنا ہو گا۔

محمد اورنگزیب نے کہا کہ انفرااسٹرکچرکی بہتری کیلئے کچھ صوبوں نے بہترین کام کیا، پبلک پرائیویٹ منصوبوں سے استحکام لایا جاسکتا ہے، ہمیں پہلے سے موجود پالیسیوں پرعملدرآمد کرانا ہے۔

وفاقی وزیرخزانہ نے کہا کہ ہمیں ون ونڈو آپریشن فعال کرنا ہے اور غیرملکی اور مقامی سرمایہ کاری کیلئے سازگاری ماحول پیدا کرنا ہو گا، آئی ٹی اور زراعت کے شعبے میں بے پناہ صلاحیت موجود ہے۔