اسلام آباد: پاکستان نے ایک ارب ڈالر کے یورو بانڈز کی بروقت ادائیگی کردی ہے۔

اسٹیٹ بینک آف پاکستان کی جانب سے بتایا گیا ہے کہ 1 ارب ڈالر کے بین الاقوامی پاکستانی بانڈ کی ادائیگی کردی گئی ہے۔

اسٹیٹ بینک کے مطابق پاکستان کی جانب سے 12 اپریل 2024 کو معیاد پوری کرنے والے ایک ارب ڈالر بانڈ کی ادائیگی کی گئی۔

اسٹیٹ بینک نے مزید بتایا کہ بانڈ ہولڈرز کو آگے کی تقسیم کے لیے ادائیگی ایجنٹ بینک کو کی گئی، ادائیگی میں اصل اور سود دونوں ادا کیے گئے ہیں۔

واضح رہے کہ پاکستان کے زر مبادلہ کے ذخائر 8ارب ڈالر سے بڑھنے کے بعد پاکستان کی جانب سے عالمی سرمایہ کاروں کو جلد یا وقت پر ادائیگی کی توقعات کی وجہ سے یورو بانڈ کی قیمت بلند ترین سطح پر پہنچ گئی تھی اور ایک بانڈ ایک ڈالر تک پہنچ گیا تھا۔

ٹاپ لائن سکیورٹیز کے سی ای او محمد سہیل نے کہا تھا کہ پاکستان نے زر مبادلہ کے ذخائر کے بحران کے باوجود دسمبر 2023میں میچور ہونے والے ایک ارب ڈالر کے یورو بانڈ کی ادائیگی وقت سے قبل کردی تھی، پاکستان کے 2024کے بانڈز کی ساکھ میں گزشتہ 18ماہ کے دوران 160فیصد اضافہ ہوا ہے۔