میٹرک اور انٹر کے طلبا کے لئے بڑی خوشخبری آگئی ہے۔

تفصیلات کے مطابق نگران وزیر اعلیٰ پنجاب محسن نقوی نے لاہور تعلیمی بورڈ کا دورہ کیا، جہاں انہوں نے طلبہ کی سہولت کیلئے ای سروسز اور موبائل ایپ کا افتتاح کیا۔

 ای سروسز کے ذریعے رزلٹ کارڈ، سرٹیفکیٹ کی تصدیق، این او سی مائیگریشن اور دیگراسناد کا حصول آسان ہوگا۔

افتتاح کے موقع پر محسن نقوی نے کہا کہ پنجاب کے باقی 8 بورڈز ایک ہفتے میں آن لائن کرنے جا رہے ہیں طلبہ کو گھنٹوں گھنٹوں بورڈ آفس آکر خوار نہیں ہونا پڑے گا۔

انہوں نے کہا کہ گھنٹوں گھنٹوں لائن میں لگنا پڑتا تھا فیسوں کیلئے بینک جانا پڑتا تھا، اسٹوڈنٹس کے پاس آپشن ہوگا، خود آکر وصول کرلیں یا کوریئرسروس کے ذریعے منگوالیں، ایجوکیشن میں ہم اتنا کام نہیں کرسکے جتنا ہونا چاہیے تھا، ہائیر ایجوکیشن اور اسکولز ملالیں تو اس سے بڑا کوئی ڈیپارٹمنٹ نہیں۔

نگران وزیر اعلیٰ پنجاب نے کہا کہ ایجوکیشن اور ہیلتھ لوگوں کو اچھی دی جائے تو کچھ اور نہیں چاہیے، اچھی تعلیم ہوگی تو میں بھی اپنے بچے کو آنکھیں بند کر کے سرکاری اسکول میں پڑھاؤں گا، ہم نے چند اسکولوں کو پک کرکے ٹھیک کرنے کی کوشش کی مگر سمندر میں قطرے کے برابر ہے۔

انہوں نے کہا کہ ہزاروں اسکولز میں سے درجن بھر ٹھیک ہوجانا کوئی بڑی بات نہیں، پوری ٹیم نے بہت اچھا کام کیا امید ہے اگلے ہفتے تک باقی 8 بورڈز بھی آن لائن ہوں گے۔