وزیر تعلیم پنجاب رانا سکندر حیات کا کہنا ہے کہ پنجاب کے ہر بچے کو تعلیم کا حق دینے کا عزم لے کر آئے ہیں۔

 وزیر تعلیم پنجاب رانا سکندر حیات کا کہنا ہے کہ ہمارا ویژن ہے کہ پنجاب میں دنیا کا بہترین تعلیمی نظام لاگو کریں گے۔

انہوں نے کہا کہ صوبے میں تعلیمی انقلاب کیلئے دن رات محنت کریں گے، ایک کروڑ آؤٹ آف اسکول بچوں کو اسکولوں میں لانا بڑا چیلنج ہے۔

 رانا سکندر حیات نے کہا کہ پنجاب میں دنیا کا سب سے کمال تعلیمی سسٹم اور بہترین نصاب متعارف کروائیں گے، ایسی ایجوکیشن پالیسی لا رہے ہیں کہ پنجاب کی تعلیمی ترقی کی مثال دی جا سکے گی۔

وزیر تعلیم پنجاب نے کہا کہ کوالٹی آف ایجوکیشن بہتر کرنے پر فوکس ہے، گزشتہ 76 سالوں میں جو تعلیمی ڈویلپمنٹ نہیں ہو سکی، ان کا ازالہ کریں گے۔

انہوں نے کہا کہ گزشتہ حکومت کی طرح عوام کو دلاسے نہیں دیں گے، ماضی کی حکومت نے ایک بھی ایجوکیٹرز بھرتی نہیں کیا۔

رانا سکندر حیات نے کہا کہ گزشتہ حکومت کے نام نہاد تعلیمی اقدامات کا نتیجہ اساتذہ بھی بھگت رہے ہیں، اساتذہ کی ایک لاکھ سے زائد خالی آسامیاں گزشتہ حکومت کی تعلیمی کارکردگی پر سوالیہ نشان ہیں۔

وزیر تعلیم پنجاب نے کہا کہ خالی آسامیاں پر کر کے تعلیمی اداروں میں اساتذہ کی کمی پوری کی جائے گی، اساتذہ کے مسائل حل، سرکاری اسکولوں پر عوام کا اعتماد بحال کریں گے۔