اس میں کوئی شک نہیں کہ خراب نیند یا بے خوابی سر سے پیر تک تباہ کن کیفیت ہے۔ لیکن اب معلوم ہوا ہے کہ مسلسل نیند کے متاثر ہونے سے مائیگرین کے حملے بڑھ سکتے ہیں۔

جامعہ ایریزونا میں واقع کومپرہیینسو سینٹر فار پین ایک ایڈکشن سے وابستہ سائنسدانوں نے کہا ہے کہ انسومنیا یا بے خوابی، متاثرہ نیند یا 8 گھنٹے سے کم کی نیند سے مائیگرین لاحق ہوسکتا ہے اور اس کا الٹ بھی درست ہے یعنی مائیگرین کے مریضوں میں نیند کی کمی یا خرابی بھی پائی جاتی ہے۔

ڈاکٹر فرینک پوریشا نے کہا ہے کہ نیند اورمائیگرین کے درمیان ایک عرصے سے تعلق دریاف ہوا ہے۔ اگر آپ مائیگرین کے مریض نہ ہوں تو خراب نیند سے یہ مرض آپ کو لاحق ہوسکتا ہے اور اس سے امکانات بہت بڑھ جاتے ہیں۔ اگرچہ یہ تحقیق چوہوں پر کی گئی ہے لیکن اس کے انسانی اثرات کو نظرانداز نہیں کیا جاسکتا۔

معلوم ہوا کہ جن چوہوں کی نیند مسلسل خراب کی گئی ان کے دماغ میں مائیگرین جیسے درد کی علامات دیکھی گئیں جنہیں ای ای جی اور دیگر اسکین سے نوٹ کیا گیا ہے۔

اسی بنا پر ماہرین نے زور دیا ہے کہ عمر کے کسی بھی حصے میں رہنے والے افراد اپنی نیند کا بطور خاص خیال رکھیں ۔