لاہور ہائیکورٹ نےآمدن سے زائد اثاثہ جات اور منی لانڈرنگ کیس میں مسلم لیگ ن کے صدر و اپوزیشن لیڈر برائے قومی اسمبلی شہباز شریف کی عبوری ضمانت میں 16 جولائی تک توسیع کردی۔

تفصیلات کے مطابق عدالت کی جانب سے شہباز شریف کو آج حاضری سے استثنیٰ بھی دے دیا گیا۔

لاہور ہائی کورٹ کے جسٹس سردار احمد نعیم کی سربراہی میں2 رکنی بنچ نے منی لانڈرنگ کیس میں شہباز شریف کی عبوری ضمانت کی درخواست پر سماعت کی۔

اس موقع پر شہباز شریف کے وکلاءامجد پرویز اور اعظم نذیر تارڑ نےعدالت کو آگاہ کیا کہ شہباز شریف کی جانب سے حاضری سےاستثنیٰ کی بھی درخواست ہے۔

شہباز شریف کے وکلاء نے عدالت کو بتایا کہ کورونا ٹیسٹ نیگیٹو آیا ہے، ان کی عمر 69 برس ہے، ان کا اینٹی باڈیز ٹیسٹ ہونا ضروری ہے، جو لوگ کورونا سے صحت یاب ہوئے ہیں ان میں پانچ پانچ ہفتے تک جسم میں درد رہتا ہے۔

عدالت کو بتایا گیا کہ شہباز شریف کو جسم میں درد کی اب بھی شکایت ہے، اس پر جسٹس سردار احمد نعیم نے ریمارکس دیئےکہ یہ تو ہم نے پچھلی تاریخ پرہی کہا تھا کہ شہباز شریف کو حاضری سے استثنیٰ کر دیتے ہیں، ہم انہیں آج بھی حاضری سے استثنیٰ دے دیتے ہیں۔

وکیل اعظم نذیر تارڑ نے عدالت سے استدعا کی کہ 3 ہفتے کے لیے ضمانت میں توسیع کر دیں،انہوں نے شہباز شریف سے ابھی ہدایات بھی لینا ہیں، وہ چاہتے ہیں کہ شہباز شریف خود عدالت میں پیش ہوں۔

اس پر عدالت نے ریمارکس دیئے کہ آپ کو وقت دے دیتے ہیں ،آپ ہدایات لے لیں۔

بعد ازاں عدالت نے شہباز شریف کی عبوری ضمانت میں 16 جولائی تک توسیع کردی۔