آذربائیجان اور آرمینیا سیز فائر پر راضی ہوگئے، امریکی دعویٰ


ثمرا مظہرویب ایڈیٹر

26th October, 2020

امریکا کی جانب سے دعویٰ کیا گیا ہے کہ آذربائیجان اور آرمینیا سیز فائر پر رضامند ہوگئے۔

غیر ملکی خبرایجنسی کے مطابق امریکی صدر ڈونلڈ ٹرمپ نے اپنے ایک بیان میں کہا ہے کہ دونوں رہنماوَں کی جانب سے جنگ بندی معاہدے پر عمل پیرا ہونے پر اتفاق کیا گیا جس سے بہت سی جانیں بچ جائیں گی۔

امریکی صدر نے کہا کہ سیز فائر معاہدہ کروانے پر امریکی وزیر خارجہ مائیک پومپیو اور اپنی ٹیم کے دیگر ممبران پر فخرہے۔ دونوں ممالک کے درمیان انسانی ہمدردی کی بنیاد پر سیز فائر پر اتفاق ہوا ہے۔

امریکی صدر ڈونلڈ ٹرمپ نے سیز فائر معاہدے پر آذربائیجان اور آرمینیا کو مبارکباد بھی دی۔

آذربائیجان اور آرمینیا کے درمیان متنازعہ علاقہ نگورونو کاراباخ میں آج سے جنگ بندی معاہدے کا نفاذ ہو گا