عالمی ادارہ صحت کے چیف سائنسدان سومیا سوامیناتھن نے کہا ہے کہ ایسٹرا زینیکا کی ویکسین کا استعمال جاری رکھا جائے، ویکسین کے استعمال سے خون میں پھٹکیاں بننے کے کوئی ثبوت نہیں ہے۔

تفصیلات کے مطابق عالمی ادارہ صحت نے یہ مشورہ ایک ایسے وقت میں دیا ہے کہ جب دنیا کے کئی ممالک نے برطانوی ویکسین کے استعمال کو عارضی طور پر روک دیا ہے۔

عالمی ادارہ صحت کے چیف سائنسدان سومیا سوامیناتھن نے کہا  کہ  فی الحال آکسفورڈ کی بنائی گئی کورونا ویکسین کا استعمال جاری رکھیں۔

سومیا سوامیناتھن نے کہا کہ ہم نہیں چاہتے ہیں کہ لوگوں میں اس حوالے سے خوف و ہراس پھیلے، برطانوی ویکسین کو کچھ ممالک میں اس لیے روک دیا گیا ہے وہاں ویکسین استعمال کرنے کے بعد کچھ لوگوں کے خون میں لوتھڑے بننے کی اطلاعات سامنے آئی تھیں تاہم اس ضمن میں کوئی حتمی رپورٹ سامنے نہیں آئی ہے لہذا اس کا مطلب ہرگز یہ نہیں ہے کہ ان واقعات کا تعلق کورونا ویکسینیشن سے ہے۔

عالمی ادارہ صحت کے چیف سائنسدان سومیا سوامیناتھن نے مزید کہا  کہ واقعات کی تحقیق معمول کا کام ہے جو یہ ظاہر کرتا ہے کہ نگرانی کا نظام کام کر رہا ہےجبکہ ادارے کے ویکسین سیفٹی کے ماہرین ایسٹرا اینیکا کے ڈیٹا کو دیکھ رہے ہیں۔