وزیراعظم عمران خان کو الیکٹرانک ووٹنگ مشین  پر بریفنگ دے دی گئی۔

تفصیلات کے مطابق وفاقی وزیرِ برائے سائنس اینڈ ٹیکنالوجی فواد چوہدری نے وزیرِ اعظم کو الیکٹرانک ووٹنگ مشین پر بریفنگ دی۔

وفاقی وزیر نے وزیراعظم کو کامسیٹس اور نیشنل انسٹی ٹیوٹ آف الیکٹرانکس کی جانب سے تیار کردہ الیکٹرانک ووٹنگ مشین سے آگاہ کیا اور ووٹنگ کے طریقہ کار اور مشین کے مختلف فیچرز کے بارے  میں تفصیلی بریفنگ دی۔

 بریفنگ میں بتایا گیا کہ مذکورہ مشین کی مدد سے جہاں ووٹنگ کا سارا عمل مکمل طور پر شفاف اور غیر جانبدار ہوجائے گا وہیں انتخابی عمل کے نتائج مکمل طور پر محفوظ اور فوری طور پر میسر ہوں گے۔

وزیراعظم کو بریفنگ میں بتایا گیا کہ الیکٹرانک ووٹنگ مشین کی تیاری میں ان تمام ایشوز کا حل یقینی بنایا گیا ہے جو ماضی میں انتخابی عمل کے حوالے سے اٹھائے جاتے رہے ہیں۔

وزیرِ اعظم کو الیکٹرانک ووٹنگ مشین کے ذریعے انتخابی عمل کا عملی مظاہرہ پیش کیا گیا۔

 بریفنگ میں بتایا گیا کہ وزراتِ سائنس اینڈ ٹیکنالوجی،کامسیٹس اور این آئی ای  کی مشترکہ کاوش سے تیار کی جانے والی  مشین کو محدود پیمانے پر ٹیسٹ کیا گیا ہے جس کے نہایت حوصلہ افزاء نتائج سامنے آئے ہیں۔

وزیرِ اعظم نے نمونہ مشین کی ورکنگ پر اطمینان کا اظہار کیا ہےاور  وزارتِ سائنس اینڈ ٹیکنالوجی اور کامسیٹس کی کاوشوں کو سراہا ہے۔

الیکٹرانک ووٹنگ مشین کے حوالے سے تفصیلی اجلاس بھی ہوا ہے جس میں وزیراعظم نے کہا ہے کہ بدقسمتی سے ماضی میں ملک میں  ہونے والے تقریباً  ہر الیکشن  پر  مختلف سوالات اٹھائے گئے جس سے نہ صرف انتخابی و جمہوری عمل متاثر ہوا بلکہ اس سے عوام کے اعتماد کو ٹھیس پہنچی۔

وزیراعظم نے کہا کہ ملکی جمہوری اور انتخابی عمل اب مزید کسی ایسے نظام کا متحمل نہیں ہو سکتا جہاں  نظام پر سوال اٹھائے جاتے ہوں۔

انہوں نے کہا کہ ماضی کے تجربے کی روشنی میں انتخابی عمل کو  ہر ممکن طریقے سے شفاف ، محفوظ اور غیر جانبدار بنانے کے حوالے سے الیکٹرانک ووٹنگ مشین متعارف کروانا ملک میں جمہوریت کے مفاد میں ہے، حکومت اس حوالے سے پرعزم ہے۔

وزیراعظم عمران خان نے کہا کہ مجوزہ الیکٹرانک مشین کو جدید سیکیورٹی فیچر سے مزین کرنے کے لئے کوششیں تیز کی جائیں اور اس سلسلے میں ترقی یافتہ ملکوں کے تجربے کو بھی سامنے رکھا جائے۔