تمام کاروباری مراکز 17 مئی سے رات 8 بجے تک کھلے رکھنے کا فیصلہ کیا گیا ہے۔

تفصیلات کے مطابق وفاقی وزیر اسد عمر کی زیر صدارت این سی او سی کا خصوصی اجلاس ہوا، اجلاس میں معاون خصوصی ڈاکٹر فیصل سلطان نے بھی شرکت  کی۔

ذرائع کے مطابق اجلاس میں صوبائی چیف سیکریٹریز کی جانب سے بذریعہ ویڈیو لنک شرکت کی گئی۔

اجلاس میں عید تعطیلات کے دوران ایس او پیز پر عمل درآمد پر اطمینان کا اظہار کیا گیا۔

این سی او سی کی جانب سے تمام اسٹیک ہولڈرز خصوصاً شہریوں کے تعاون کو سراہا گیا۔

ذرائع کے مطابق اجلاس میں تمام بین الصوبائی، انٹر سٹی اور انٹرا سٹی پبلک ٹرانسپورٹ 16 مئی سے کھولنے کا فیصلہ کیا گیا۔

 این سی او سی کے مطابق تمام ٹرانسپورٹ کو 50 فیصد گنجائش کے ساتھ چلنے کی اجازت ہوگی۔

ریلوے میں 70 فیصد سواریوں کے ساتھ آپریشنز کو جاری رکھا جاسکے گا۔

17 مئی سے تمام دفاتر میں50 فیصد اسٹاف کے ساتھ روٹین ٹائم ٹیبل کے مطابق کام کیا جاسکے گا۔

این سی او سی کے اجلاس میں ایس او پیز عمل درآمد کی مسلسل نگرانی پر زور دیا گیا۔

این سی او سی کی جانب سے ایس او پیز پر عمل درآمد میں عوام سے تعاون جاری رکھنے کی اپیل بھی کی گئی ہے۔

این سی او سی کی شہریوں کو کورونا ویکسی نیشن کے لیے جانے سے پہلے 1166 پر پہلے رجسٹریشن کروانے کی بھی اپیل کی گئی۔

اجلاس میں تمام فریقین کی طرف سے عمل درآمد یقینی بنانے کی کوششوں کو سراہا گیا۔