مقبوضہ کشمیر میں کشمیری عوام اپنے بنیادی حقوق سے آج بھی محروم ہیں، عمران اسماعیل

اسفا سروت

05th Aug, 2021. 09:55 am
،عمران اسماعیل

گورنر سندھ عمران اسماعیل نے کہا کہ مقبوضہ کشمیر میں کشمیری عوام اپنے بنیادی حقوق سے آج بھی محروم ہیں۔

تفصیلات کے مطابق گورنر سندھ عمران اسماعیل نے یوم استحصال کشمیر کے موقعے پر پیغام دیتے ہوئے کہا کہ آج ملک بھر میں ریاستی سطح پر یوم استحصال کشمیر منایا جا رہا ہے، اس کا مقصد اقوامِ عالم کو یہ باور کروانا ہے کہ 5 اگست 2019 کو ہندوستان نے یکطرفہ اقدام کرتے ہوئے غیر قانونی طریقے سے جموں کشمیر کی خصوصی حیثیت ختم کر کے وہاں بدترین مظالم کا سلسلہ شروع کیا۔

انہوں نے کہا کہ آرٹیکل 370 کے خاتمے کے بعد ہندوستان ہر حربہ آزما چکا ہے لیکن اہل کشمیر کا جذبہ حریت سرد نہیں ہوا، مقبوضہ کشمیر میں مواصلاتی بلیک آؤٹ آج بھی جاری ہے۔

گورنر سندھ نے کہا کہ وزیر اعظم پاکستان نے اقوام متحدہ کے چوہترویں اجلاس میں کشمیریوں کا مقدمہ احسن طریقے سے پیش کر کے کشمیریوں کے سفیر کے طور پر آواز بلند کی۔

عمران اسماعیل نے کہا کہ آج کے دن پوری پاکستانی قوم اور دنیا میں جہاں جہاں کشمیری بستے ہیں کشمیریوں کے ساتھ کیے جانے والے استحصال کو اجاگر کریں اور ان کے ساتھ تجدید عہد کریں گے۔

گورنر سندھ عمران اسماعیل نے مزید کہا کہ کشمیری عوام آزادی حاصل کر کے رہے گی اور ہماری حکومت اس عزم و استقلال میں کشمیری بھائیوں کے ساتھ ہے۔

Square Adsence 300X250