وزیراعظم عمران خان نے بلدیاتی انتخابات کے لئے پارٹی کو متحرک کرنے کی ہدایت کر دی ہے۔

تفصیلات کے مطابق وزیراعظم عمران خان کی ہدایت پر مقامی حکومتوں کے انتخابات سے قبل پاکستان تحریک انصاف (پی ٹی آئی) کی بھرپور صف بندی کی تیاریوں کا آغاز کردیا گیا ہے۔

ذرائع کے مطابق وزیراعظم عمران خان کی ہدایات کی روشنی میں چیف آرگنائزر سینیٹر سیف اللہ خان نیازی ملک گیر دوروں کیلئے پوری طرح تیار ہیں۔

ذرائع نے بتایا ہے کہ چیف آرگنائزر سینیٹر سیف اللہ خان نیازی اپنے ملک گیر دوروں کی ابتداء جنوبی پنجاب کے اہم ضلع بہاولنگر سے کریں گے، سینیٹر سیف اللہ خان نیازی 11 ستمبر کو بہاولنگر جائیں گے۔

اس کے علاوہ تحریک انصاف جنوبی پنجاب کے صدر سینیٹر عون عباس بپی کی قیادت میں ریجنل و ضلعی ذمہ داران کو چیف آرگنائزر کی آمد سے آگاہ کر دیا گیا ہے۔

ذرائع نے بتایا ہے کہ دورہ بہاولنگر کے دوران سینیٹر سیف اللہ خان نیازی مقامی قیادت سے خصوصی ملاقات کریں گے۔

خیال رہے کہ چیف آرگنائزر سینیٹر سیف اللہ خان نیازی تحریک انصاف اراکین قومی و صوبائی اسمبلی اور کلیدی سیاسی زعما سے بھی ملیں گے۔

واضح رہے کہ دورہ بہاولنگر کے دوران چیف آرگنائزرسینیٹر سیف اللہ خان نیازی تنظیمی و انتظامی معاملات کا  جائزہ بھی لیں گے۔