سندھ اسمبلی میں اپوزیشن کے شدید احتجاج اور تحفظات کے باوجود صوبائی حکمران جماعت پاکستان پیپلز پارٹی (پی پی پی) کی جانب سے پیش کیا گیا سندھ بلدیاتی ترمیمی بل 2021 متفقہ طور پر منظور کرلیا گیا۔

صوبائی وزیر بلدیات ناصر حسین شاہ نے سندھ بلدیات ترمیمی بل صوبائی اسمبلی میں پیش کیا تھا، اس موقع پر اپوزیشن نے احتجاج کیا۔

سندھ اسمبلی کا اجلاس ڈپٹی اسپیکر ریحانہ لغاری کی صدارت میں ہوا اور اجلاس کے ابتدا میں صحافی فہیم مغل کی خودکشی پر افسوس کا اظہار کیا گیا اور ان کی مغفرت کے لیے دعا کی گئی۔

اس موقع پر شمیم ممتاز نے کہا کہ چیف جسٹس نوٹس لیں اور نا اہل وزیر اعظم ہٹایا جائے۔

پروین قائم خانی کا کہنا تھا کہ لوگ خودکشیاں کررہے ہیں، دعا کریں نا اہل حکومت سے چھٹکارا ملے۔

سندھ بلدیات ترمیمی بل صوبائی اسمبلی میں پیش

سندھ اسمبلی کے اجلاس کے دوران صوبائی وزیر بلدیات ناصر حسین شاہ نے سندھ بلدیات ترمیمی بل پیش کیا تو اس موقع پر اپوزیشن نے احتجاج کیا اور اپوزیشن ارکان اپنی نشستوں پر کھڑے ہوگئے۔

پاکستان تحریک انصاف (پی ٹی آئی) کے رہنما حلیم عادل شیخ اور دیگر اپوزیشن ارکان پوسٹر اٹھا کر اسپیکر ڈائس کے سامنے پہنچ گئے، جن پر نعرے درج تھے، اور نعرے بازی کی۔

انہوں نے پیش کیے گئے سندھ بلدیاتی ترمیمی بل کو کالا قانون قرار دیا اور اسے نا منظور کرنے سمیت ‘سندھ کے حقوق پر ڈاکہ نامنظور’ جیسے نعرے لگائے۔

سندھ بلدیاتی ترمیمی بل پیش کرنے سے قبل صوبائی وزیر بلدیات ناصر حسین شاہ نے کہا تھا کہ یہ جو بل آج ہم لا رہے ہیں سب کو مہیا کردیا گیا ہے اس میں کچھ ترامیم بھی آگئی ہیں اور اس میں سب کو سنا جائے گا۔

انہوں نے کہا کہ الیکشن کمیشن نے ہمیں ایک ٹائم فریم دیا ہے ہمارے مردم شماری پر تحفظات تھے، پہلے تو ایم کیو ایم کے بھی تحفظات تھے لیکن بعد میں وہ بھی پیچھے ہٹ گئے۔

صوبائی وزیر بلدیات کا کہنا تھا کہ کراچی کی ابادی کو بہت کم شو کیا گیا ہے، ہمارے نمائندوں نے اس پر اعتراضات کیے ہیں۔

انہوں نے کہا کہ اس میں بہت ساری تجاویز پی ٹی آئی، ایم کیو ایم اور جماعت اسلامی سے لی گئی تھی میرے پاس ان جماعتوں کی طرف سے تجاویز ریکارڈ پر موجود ہیں ان کی تجاویز کو ہم نے شامل کیا ہے۔

ان کا کہنا تھا کہ اگر ان کو 2013 والا قانون منظور ہے تو ہم یہ بل پیش نہیں کرتے ہیں، بلاول بھٹو چاہتے ہیں کہ جو نمائندے آئیں ان کو اختیارات دیئے جائیں، یہ کوئی صحیفہ نہیں ہے اس میں بعد میں ترمیم کی جاسکتی ہیں۔

بعد ازاں اپوزیشن کے احتجاج کے باوجود صوبائی اسمبلی میں سندھ بلدیاتی ترمیمی بل 2021 متفقہ طور پر منظور کرلیا گیا۔

اس موقع پر صوبائی وزیر بلدیات ناصر حسین شاہ نے کہا کہ ہماری لیڈر شپ کا ویژن ہے میں سب کا شکر گزار ہوں اور ساتھ ہی دعویٰ کیا کہ ایک ٹی ایل پی خاتون رکن یہاں موجود تھیں اور انہوں نے بھی بل کی منظوری دی ہے۔

سندھ کے بلدیاتی نظام پر پھر ڈاکا ڈالنے کی کوشش کی گئی، رہنما ایم کیو ایم

بول نیوز کو موصول ہونے والی ترمیمی بل کی کاپی کے مطابق سندھ بلدیاتی ترمیمی بل 2021 کے ذریعے صوبے بھر میں سابق صدر جنرل ریٹائرڈ پرویز مشرف دور کا ٹاؤن سسٹم بحال کیا جائے گا۔

مجوزہ نئے بل کے تحت بلدیاتی اداروں کومزید با اختیار بنایا جائے گا، میٹروپولیٹن سسٹم میں اضلاع ختم کرکے ٹاؤن نظام متعارف کرایا جائے گا، ضلع کونسل ختم کرکے ٹاؤن میونسپل کارپوریشن قائم کی جائیں گیں جب کہ مجوزہ قانون کے مطابق کچرا اٹھانے اور واٹر اینڈ سیوریج کا نظام میئر کے ماتحت ہوگا۔