پی ٹی آئی کی رہنماء عالیہ حمزہ نے کہا ہے کہ مریم نواز کو جھوٹ، بے شرمی اور ڈھٹائی کا ایوارڑ ملنا چاہیے۔

عالیہ حمزہ نے مریم نواز کی پریس کانفرنس پر ردِ عمل دیتے ہوئے کہا کہ کیلبری باجی کو جھوٹ، بے شرمی، ڈھٹائی کا آسکر ملنا چاہیے، مریم نواز نے ‏وزیر اعظم ہاؤس میں بیٹھ کر ہائی سیکیورٹی آڈیو ٹیپ کر کے ڈان لیکس کی۔

انہوں نے کہا کہ چیف جسٹس کی جھوٹی آڈیو پر خود کو سرخرو کرنے والی کا اپنی اصلی آڈیو پر دوغلاپن سامنے ہے، ساری دنیا کو معلوم ہو چکا ویڈیوز بنانا اور انکو لیک کرنا ان کا خاندانی پیشہ ہے۔

ان کا کہنا تھا کہ اپنی باری پرائیویسی کا رونا روتے ہیں کس قدر گھٹیا لیول کا خاندان ہے، جو ان کا ساتھ دے وہ چیئرمین پیمرا، چیئرمین کرکٹ بورڈ بنا دیا جاتا ہے۔

پی ٹی آئی کی رہنماء عالیہ حمزہ نے مزید کہا کہ جو ان کی پارٹی کو پروموٹ کرے اسکے لیے ٹوکریاں پیش کی جاتی ہیں، جو انکی کرپشن کا پردہ چاک کرے وہ گالیوں کا مستحق بن جاتا ہے۔

واضح رہے کہ ماڈل ٹاؤن میں پریس کانفرنس کے دوران مریم نواز نے کہا تھا کہ میری ںجی فون کی آڈیو کیوں ریکارڈ کی گئی؟ کس کو حق تھا کہ میرے فون کو ٹیپ کرے؟ کیوں اسے آن ائیر کیا گیا؟

مریم نواز نے کہا تھا کہ پرویز رشید یا کوئی بھی ذاتی گفتگو میں کیا بات کرتے ہیں اس کا جواب نہیں دینا، خاتون کی ریکارڈنگ کیوں دی پہلے اس سے معذرت کی جائے۔

ان کا کہنا تھا کہ میری ٹیپ سے ذاتی گفتگو سے کسی کے خلاف سازش ثابت نہیں ہوتی۔

مریم نواز نے پریس کانفرنس کے دوران کہا تھا کہ قدرت نے جو انصاف کر دیا وہ دودھ کا دودھ پانی کا پانی ہوگیا، انصاف والے ادارے کب دھبے دھوئیں گے۔

انہوں نے کہا تھا کہ نواز شریف لندن اس لئے گئے کہ ان کی جان کو خطرہ تھا، وہ ڈیل کے تحت باہر نہیں گئے۔ ڈیل کی ضرورت ان کو ہوتی ہے جن کی جڑیں عوام میں نہیں ہوتیں۔

مریم نواز کا مزید کہنا تھا کہ بلدیاتی الیکشن دیکھ لیں سب ن لیگ کے حق میں ہیں، لوگ نواز شریف کو یاد کر رہے ہیں، ہم صاف و شفاف الیکشن چاہتے ہیں۔