گورنر خیبر پختونخوا شاہ فرمان کا کہنا ہے کہ پاکستان کشمیری عوام کے حق خود ارادیت میں انکے ساتھ کھڑا ہے۔

تفصیلات کے مطابق یوم یکجہتی کشمیر ریلی کے موقع پر گورنر شاہ فرمان نے میڈیا نمائندوں سے گفتگو کرتے ہوئے کہا کہ پاکستان کشمیری عوام کے حق خود ارادیت اورجدوجہدآزادی میں انکے ساتھ کھڑا ہے۔

 گورنر خیبر پختونخوا شاہ فرمان کا کہنا تھا کہ بھارتی قبضے سے آزادی کیلئے کشمیری عوام سے یکجہتی و مکمل حمایت جاری رکھیں گے۔

 شاہ فرمان نے کہا کہ مسئلہ کشمیر واحد عالمی مسئلہ ہے جو 1948 میں اقوام متحدہ کے عالمی فورم پر لایا گیا، صدیاں گزر گئیں لیکن اقوام متحدہ کی کشمیری عوام کو حق خودارادیت دینے کی قراردادوں کے باوجود یہ مسئلہ آج تک حل نہیں ہو سکا۔

گورنر شاہ فرمان نے کہا کہ مقبوضہ کشمیر میں بھارت کے مظالم رکنے کے باوجود ہر نئے دن کے ساتھ بڑھتے جا رہے ہیں، انڈیا کھلے عام نہتے کشمیریوں کا قتل عام اور انسانی حقوق کی پامالیوں کا مرتکب ہو رہا ہے۔

گورنر خیبر پختونخوا کا کہنا تھا کہ بھارت نے مقبوضہ جموں و کشمیر کی وادی کو اس وقت دنیا کے ایک بڑے فوجی زون اور بڑی جیل میں بدل دیا ہے، مقبوضہ وادی میں بھارتی مظالم بھارتی انتہاپسند نظریہ کا کھلا ثبوت ہیں۔

 شاہ فرمان نے کہا کہ بھارت کی یہی انتہا پسندانہ سوچ و نظریہ نہ صرف اس خطہ بلکہ دنیا کے امن کیلئے بہت بڑا خطرہ ہے۔

انہوں نے مزید کہا کہ انشاء اللہ وہ دن دور نہیں جب مقبوضہ کشمیرکے عوام بھارتی تسلط اورظلم وجبرسے آزاد ہوں گے۔