بھارتی دارالحکومت نئی دہلی کے علاقے دوارکا میں ایک خاتون نے حیوانیت کی تمام حدیں پار کردی ہیں۔

بھارتی ذرائع ابلاغ کے مطابق 42 سالہ خاتون نے ایک نابالغ لڑکے کو مبینہ طور پر تشدد کا نشانہ بنایا، اس کا جنسی استحصال کیا اور اس کے عضو خاص میں سلاخ ڈال دی۔

پولیس نے خبر رساں اداروں کو بتایا کہ شکایت کنندہ آٹھ سال کا معصوم بچہ ہے، جس نے اپنی ماں کو بتایا کہ ملزمہ نے پہلے اس کی پٹائی کی اور بعد میں اس کے ساتھ سیکٹر 22 میں آواسی بھون کی چھت پر غیر فطری جرم کا ارتکاب کیا۔

پولیس کے حوالے سے جاری خبر کے مطابق آٹھ سالہ بچے کو ملزمہ نے نہ صرف پیٹا بلکہ اس کے عضوِ خاص میں سلاخ نما ایک چیز بھی ڈالی۔

پولیس کا کہنا ہے کہ انہیں واقعے کی اطلاع 13 مارچ کی شام تقریباً چھ بجے ملی۔ بچے کی ماں نے شکایت کی کہ جب ان کا لڑکا کھیل رہا تھا، تب ایک نامعلوم خاتون نے ان کے بیٹے کے ساتھ مار پیٹ کی۔

پولیس نے مزید کہا کہ ایک خاتون سب انسپکٹر کو تفتیش کے لیے کہا گیا تھا۔ جانچ کے دوران ہمیں ماں کے بیان کی تصدیق کرنے والے ثبوت ملے ہیں۔

جس کے بعد سیکٹر 23 پولیس اسٹیشن میں چوٹ، غیر فطری جرم ، پاکسو ایکٹ اور جے جے ایکٹ کی دفعات کے تحت مقدمہ درج کیا گیا تھا۔

پولیس نے کہا کہ 42 سالہ کویتا کو تین دن بعد اس کے گھر سے گرفتار کیا گیا۔ جس نے دوران تفتیش اعتراف کیا کہ اس نے بچے کو تھپڑ مارا اور بعد میں اس کے پرائیویٹ پارٹ میں ایک چیز ڈال کر اس کا جنسی استحصال کیا۔

تفتیشی افسر کا کہنا ہے کہ ثبوتوں اور واقعات کے سلسلہ کا پتہ لگانے کے لیے مزید تفتیش جاری ہے۔