چیئرمین سینیٹ محمد صادق سنجرانی نے کہا ہے کہ عوام کو صحت کی بہترین سہولیات فراہم کرنا حکومت کی اولین ترجیحات میں سے ایک ہے۔

چیئرمین سینیٹ محمد صادق سنجرانی سے پاکستان میں عالمی ادارہ صحت کے نمائندے ڈاکٹر پلیتھا گونراتھنا کی پارلیمنٹ ہاؤس میں ملاقات ہوئی ہے۔

ملاقات میں دونوں رہنماأں نے پاکستان میں کورونا وائرس کی صورتحال پر تبادلہ خیال کیا اور ڈاکٹر پلیتھا نے چیئرمین سینیٹ کو ڈبلیو ایچ او کے پاکستان میں منصوبوں سے متعلق آگاہ کیا۔

 اس موقع پر چیئرمین سینیٹ نے کہا کہ کورونا وائرس سے نمٹنے کے لیے ڈبلیو ایچ او کا بروقت تعاون مثالی رہا اور امید ہے ڈبلیو ایچ او پاکستان کے لیے تعاون کی فراہمی جاری رکھے گا۔

چیئرمین سینیٹ نے کورونا وائرس (کوویڈ 19) ویکسین تک رسائی کے لیے بہترین تعاون فراہم کرنے پر ڈاکٹر پلیتھا شکریہ ادا کیا اور کہا کہ پاکستان کو انسداد پولیو کے اقدامات کو مزید تیز کرنے کی ضرورت ہے اور بتایا کہ پاکستانی عوام کو صحت کی بہتر سہولیات فراہم کرنے میں عالمی ادارہ صحت نے ہمیشہ مدد کی ہے۔

ڈاکٹر پلیتھا کا کہنا تھا کہ پاکستان اس خطے کا واحد ملک ہے جہاں اس وبائی مرض کو موثر انداز میں قابو کیا گیا۔