وزیر اعلیٰ خیبر پختونخوا کی زیر صدارت اجلاس ہوا جس میں لمپی اسکن ڈیزیز کی صورتحال کا جائزہ لیا گیا۔

تفصیلات کے مطابق وزیر اعلیٰ خیبر پختونخوا محمود خان کی زیر صدارت مویشیوں میں  لمپی اسکن ڈیزیز سے متعلق اجلاس ہوا جس میں لمپی اسکن ڈیزیز کی مجموعی صورتحال کا تفصیلی جائزہ لیا گیا۔

  اجلاس میں صوبے میں اس بیماری کی تازہ صورتحال کے بارے میں بریفنگ دی گئی۔

بریفنگ دیتے ہوئے بتایا گیا کہ خیبر پختونخوا میں لمپی اسکن ڈیزیز کا پہلا کیس رواں سال اپریل میں رپورٹ ہوا، اس وقت بیماری سے صوبے کے 25 اضلاع جزوی طور پر متاثر ہوئے ہیں۔

 اجلاس میں بریفنگ دیتے ہوئے بتایا گیا کہ رواں سال عید الاضحٰی کے موقع پر لمپی اسکن ڈیزیز کے کیسز میں اضافے کا خدشہ ہے، صوبائی حکومت اس بیماری پر قابو پانے کے لئے ہنگامی بنیادوں پر اقدامات اٹھا رہی ہے، اس مقصد کے لئے صوبائی سطح پر ٹاسک فورس تشکیل دی گئی ہے۔

  بریفنگ دیتے ہوئے بتایا گیا کہ صوبے اور اضلاع کے انٹری پوائنٹس پر اینیمل چیک پوسٹس قائم کی گئی ہیں، اب تک آٹھ لاکھ سے زائد مویشیوں پر اس بیماری سے بچاؤ کا اسپرے کیا گیا ہے۔

 اجلاس میں بریفنگ دیتے ہوئے بتایا گیا کہ اب تک بیماری سے متاثرہ دو لاکھ 75 ہزار مویشیوں کو ویکسین لگائی گئی ہے، بیماری سے متاثرہ مویشیوں میں اموات کی شرح 5 فیصد ہے۔

 اجلاس میں  مزید ویکسین کی خریداری کے لئے درکار فنڈز  فوری فراہم کرنے کا فیصلہ کیا گیا۔

  وزیر اعلیٰ کے پی کے نے متعلقہ حکام کو اس بیماری کے پھیلاؤ کو روکنے کے لئے اقدامات کو مزید تیز کرنے کی ہدایت دی۔

 محمود خان نے کہا کہ صورتحال پر ہمہ وقت نظر رکھنے کے لئے نگرانی کا موثر نظام واضع کیا جائے، محکمہ خزانہ اور لائیو اسٹاک مزید ویکسین کی خریداری کے لئے فنڈز کے اجراء سے متعلق معاملات کو حتمی شکل دیں۔

انہوں نے کہا کہ صوبائی حکومت اس مقصد کے لئے تمام مالی وسائل ترجیحی بنیادوں پر فراہم کرے گی۔