وزیر خارجہ بلاول بھٹو زرداری نے اعلان کیا ہے کہ برطانیہ نے پاکستان کو خطرناک ممالک کی فہرست سے نکال دیا ہے۔ 

پاکستان پیپلزپارٹی کے چیئرمین اور وزیر خارجہ بلاول بھٹو زرداری نے ٹوئٹ کے ذریعے یہ اعلان کیا کہ برطانیہ نے پاکستان کو باضابطہ طور پر تیسری دنیا کے خطرناک ممالک کی فہرست سے نکال دیا ہے۔

بلاول بھٹو زرداری نے اپنی ٹوئٹ میں لکھا ’’اچھی خبر ہے کہ فنانشل ایکشن ٹاسک فورس (ایف اے ٹی ایف) کے ایکشن پلان کی جلد تکمیل پر برطانیہ نے پاکستان کو تیسری دنیا کے خطرناک ممالک کی فہرست سے خارج کر دیا ہے‘‘۔

Some good news. The United Kingdom has officially removed Pakistan from its list of ‘High Risk Third Countries’ following our early completion of FATF action plans. 🇵🇰 🤝 🇬🇧 pic.twitter.com/clcGHy5771

Advertisement

— BilawalBhuttoZardari (@BBhuttoZardari) November 14, 2022

وزیر خارجہ نے نے برطانیہ کے فارن کامن ویلتھ ایںڈ ڈویلپمنٹ آفس سے جاری ایڈوائزری نوٹس شیئر کیا ہے جس کے مطابق برطانیہ نے تیسری دنیا کے خطرناک ترین ممالک کی فہرست میں ترمیم کی ہے۔ اس ترمیم سے 21 اکتوبر 2022 میں ایف اے ٹی ایف کی جانب سے کیے گئے فیصلے کے تناظر میں پاکستان کو فہرست سے نکال دیا گیا ہے۔

خیال رہے کہ برطانیہ نے گذشتہ سال اپنے منی لانڈرنگ اور دہشت گردی کی مالی اعانت (ترمیمی) کے حوالے سے خطرناک ترین ممالک کے ضابطے 2021 کے تحت پاکستان کو شیڈول 3 زیڈ اے میں شامل (انتہائی خطرات کے حامل) 21 ممالک کی فہرست میں شامل کیا تھا۔

تاہم گذشتہ ماہ بین الاقوامی ادارے فنانشل ایکشن ٹاسک فورس (فیٹف) کی جانب سے پاکستان کو اپنی’گرے لسٹ‘ سے نکالنے کے بعد برطانیہ نے بھی اپنا فیصلہ تبدیل کردیا۔