عرب میڈیا کی رپورٹ کے مطابق ترکیہ کے دارالحکومت استنبول میں دھماکہ ہوا ہے کہ جس کے نتیجے میں 5 افراد ہلاک ہو گئے ہیں۔

عرب میڈیا کے مطابق استنبول کے تقسیم اسکوائر پر ہونے والے اس دھماکے میں 5 افراد ہلاک ہو گئے ہیں جبکہ 36 افراد کے زخمی ہونے کی اطلاعات موصول ہوئی ہیں۔

زخمیوں کو فوری طور پر قریبی اسپتالوں میں منتقل کر دیا گیا۔ زخمیوں میں 4 افراد شدید زخمی ہیں جس کی وجہ سے ہلاکتوں میں اضافے کا خدشہ ظاہر کیا جارہا ہے۔تاہم فائر بریگیڈز اور پولیس نے موقع پر پہنچ کر علاقے کو گھیرے میں لے لیا ہے۔۔

دھماکے کے وقت عوام کثیر تعداد میں موجود تھی۔قانون نافذ کرنے والے ادارے دھماکے کی وجوہات پر تحقیق کر رہے ہیں۔ غیرمصدقہ اطلاعات کے مطابق دھماکا خود کش حملہ آور نے کیا۔ جبکہ سرکاری ذرائع سے حتمی تصدیق باقی ہے۔۔

عرب میڈیا کا کہنا ہے کہ دھماکہ استنبول کے تقسیم اسکوائر کے قریب مشہور پیدل چلنے والے استقلال ایونیو پر ہوا ہے، جہاں سیاحوں کی بڑی تعداد موجود ہوتی ہے۔

istiklal caddesi'ndeki patlama anı pic.twitter.com/3fM5KRQLWW

— fırat (@firatfstk) November 13, 2022

ترک میڈیا کے مطابق دھماکے بعد علاقے میں خوف و ہراس پھیل گیا ہے، پولیس کی بھاری نفری جائے حادثہ پر پہنچ چکی ہے، جبکہ ایمبولینسز اور فائر برگیڈ کی گاڑیاں بھی جائے حادثے پر نظر آ رہی ہیں۔

سوشل میڈیا کے صارفین کے مطابق جائے حادثہ کے گردونواح میں دکانیں اور مارکیٹس بند کر دی گئی ہیں اور راستے بھی بلاک ہو گئے ہیں۔

 ایک سینئر اہلکار نے بتایا کہ استنبول کے مشہور پیدل چلنے والے استقلال ایونیو پر ہونے والے دھماکے میں لوگ ہلاک اور زخمی ہو گئے ہیں۔

استنبول کے گورنر علی یرلیکایا نے ٹوئٹ کیا کہ دھماکہ اتوار کی شام تقریباً ساڑھے چار بجے ہوا اور اس میں شخمیوں کے علاوہ ہلاکتیں بھی ہوئی ہیں، تاہم انہوں نے ہلاک ہونے والے افراد کی تعداد نہیں بتائی، دھماکے کی وجہ اور نوعیت ابھی تک واضح نہیں ہو سکی ہے۔