نگراں وزیراعلیٰ پنجاب کی تعیناتی کیخلاف صدرمملکت، وزیراعظم اور چیف الیکشن کمیشن کو خط ارسال کردیا گیا۔

تفصیلات کے مطابق نگران وزیراعلیٰ پنجاب کی تعیناتی کےخلاف خط جوڈیشل ایکٹوازم ہینل کےسربراہ اظہرصدیق ایڈووکیٹ کی جانب سے  صدرمملکت ڈاکٹرعارف علوی، وزیراعظم شہباز شریف اور چیف الیکشن کمیشن کوبھجوایا گیا ہے۔

جوڈیشل ایکٹوازم ہینل کےسربراہ اظہرصدیق ایڈووکیٹ کی جانب سے خط کے متن کے مطابق کہا گیا کہ الیکشن کمیشن نے نگران وزیراعلیٰ کی تعیناتی میں اپنی آئینی ذمہ داری ادا نہیں کی۔

خط کے متن کے مطابق الیکشن کمیشن نے کس بنیاد پر محسن نقوی کو نگران وزیراعلیٰ تعینات کیا وجوہات نہیں بتائیں۔ الیکشن کمیشن نے باقی امیدواروں کو کیوں نظرانداز کیاجواز پیش نہیں کیا۔

اظہرصدیق ایڈووکیٹ کی جانب سے خط میں کہا گیا کہ صاف شفاف انتخابات کرانا الیکشن کمیشن کا کام ہے۔ الیکشن کمیشن اپنا فرض ادا کرنے میں ناکام دکھائی دیے۔ نگران وزیراعلیٰ سیاسی وابستگیوں رکھتے ہیں۔

خط کے متن میں کہا گیا کہ نگران وزیراعلیٰ پنجاب سابق وزیراعظم عمران خان کےخلاف عدم اعتماد کی تحریک میں متحرک رہے۔  نگران وزیراعلیٰ نے کرپشن کااعتراف کرتے ہوئے نیب کو رقم واپس کی۔ نگران وزیراعلیٰ شفاف انتخابات کےلئے الیکشن کمیشن کی معاونت کا پابند ہے۔

صدر، وزیراعظم اور چیف الیکشن کمیشن کو ارسال کیے گئے خط میں یہ بھی کہا گیا کہ الیکشن کمیشن کا سیاسی وابستگی رکھنے والے نگران وزیراعلی کی تعیناتی کانوٹیفکیشن نامناسب ہے۔ نگران وزیراعلی کو کام سے روکتے ہوئے الیکشن کمیشن تعیناتی کا نوٹیفکیشن واپس لے۔