نگراں وفاقی وزیر صحت ڈاکٹر ندیم جان نے کہا ہے کہ پولیو پروگرام ملک میں کہیں بھی پائے جانے والے وائرس سے نمٹنے کے لئے تیار ہے۔

تفصیلات کے مطابق نگراں وفاقی وزیر صحت ڈاکٹر ندیم جان نے کہا کہ ماحول میں پولیو وائرس کی موجودگی تشویش کی بات ہے کیونکہ وائرس بچوں کے لئے خطرہ ہے۔

انہوں نے کہا کہ بچوں کو معذور کرنے والے پولیو وائرس سے بچانے کا سب سے مؤثر طریقہ ویکسین ہے، والدین اس بات کو یقینی بنائیں کہ ان کے بچوں کو پولیو ویکسین کی متعدد خوارکیں ملیں تاکہ انہیں عمر بھر کا تحفظ مل سکے۔

نگراں وفاقی وزیر صحت ڈاکٹر ندیم جان نے مزید کہا کہ پاکستان میں پولیو سرویلنس کا نظام حساس ترین ہے ، ماضی میں ماحولیاتی نمونے مثبت ہونے کے بعد پاکستان پولیو پروگرام وائرس کو پھیلنے سے روکنے میں کامیاب رہا ہے اور پولیو پروگرام ملک میں کہیں بھی پائے جانے والے وائرس سے نمٹنے کے لئے تیار ہے۔

نیشنل ایمرجنسی آپریشنز سینٹر کے کوآرڈینیٹر ڈاکٹر شہزاد بیگ نے کہا کہ ماحولیاتی نمونوں میں پولیو وائرس کی فوری تصدیق ظاہر کرتی ہے کہ پولیو سرویلنس کا نظام مؤثر انداز میں کام کر رہا ہے۔ہم باقاعدگی سے پولیو مہمات کا انعقاد کر رہے ہیں اور ساتھ ساتھ افغانستان میں پولیو پروگرام کے ساتھ بھی مل کر کام کر رہے ہیں تاکہ پاک افغان سرحد پر پولیو ویکسنیشن کو مزید مضبوط کیا جائے اور وائرس کو پھیلنے سے روکا جائے۔