انڈونیشیا نے غزہ میں اسپتالوں کی کمی کے باعث انسانی ہمدری کی بنیاد پر نیوی کا اسپتال بحری جہاز روانہ کر دیا ہے۔

عرب میڈیا کے مطابق انڈونیشیا کی حکومت نے فلسطینی علاقے پر اسرائیلی حملوں کے تناظر میں انسانی امداد کے سلسلے میں آج اپنے بحریہ کے ہسپتال کے جہاز کو غزہ کے قریب پانیوں میں بھیج دیا ہے۔

انڈونیشیا، جو طویل عرصے سے فلسطین کا کٹر حامی رہا ہے، نے نومبر میں غزہ میں انسانی امداد بھیجنے کے لیے دو طیارے بھیجے تھے، جن میں ادویات، خوراک، حفظان صحت کی کٹیں، کمبل، گدے اور اسپتالوں کے لیے طبی آلات شامل تھے۔

220 ٹن وزنی تیسری کھیپ انڈونیشیا کی بحریہ کے ہسپتال جہاز کے آر آئی راڈجمن ویڈیوڈیننگریٹ-992 کے ذریعے آج جکارتہ کی تنجنگ پریوک بندرگاہ سے مصر کی الآریش بندرگاہ کے لیے روانہ ہوئی۔

انڈونیشیا کے وزیر دفاع پربووو سوبیانتو نے روانگی سے قبل جہاز کے عملے سے خطاب کرتے ہوئے کہا کہ “آپ سب آج فلسطین اور غزہ میں اپنے بھائیوں اور بہنوں کے لیے امداد پہنچانے کے لیے ایک انسانی مشن پر روانہ ہوں گے۔

 وزیر دفاع پربووو سوبیانتو نے کہا کہ غزہ کے لوگ ایک بڑے المیے، بے پناہ مصائب سے گزر رہے ہیں، انسانیت کی حدود سے تجاوز کرنے والے اور بین الاقوامی قوانین کو نظر انداز کرتے ہوئے مسلسل حملوں کا سامنا کر رہے ہیں۔

وزیر دفاع پربووو سوبیانتو نے مزید کہا کہ ہم جنگ میں ملوث ملک نہیں ہیں، لیکن فلسطین میں اپنے بھائیوں کے ساتھ ہماری یکجہتی اور انسانی ذمہ داری ہے۔