کراچی: 18 ویں سندھ گیمز کے لیے میرپور خاص سے کراچی آنے والے کھلاڑی حادثے کا شکار ہوگئے۔

18 ویں سندھ گیمز کے شروع ہونے سے قبل ہی انتظامات کا پول کھل گیا ہے جب کہ کراچی آنے  والے میرپور خاص کے کھلاڑی حادثے کا شکار ہوگئے ہیں۔

میر پور خاص کی ویٹ لفٹنگ ٹیم کے دو کھلاڑیوں کو زخمی حالت میں سول اسپتال منتقل کیا گیا ہے جب کہ صدر میں واقع القیام ہوٹل کی لفٹ گر جانے سے دو ویٹ لفٹر اور ایک سیکرٹری زخمی ہوگئے۔

محمد سبحان اور محمد قاسم ہوٹل سے باہر کسی کام سے جارہے تھے، دونوں ویٹ لفٹر سندھ گیمز سے باہر ہوگئے ہیں۔

ایکسرے رپورٹ میں سبحان کے گھٹنے میں اور قاسم کے ٹخنے میں فریکچر آیا ہے جب کہ حادثے کے وقت لفٹ میں دیگر افراد بھی موجود تھے۔

ماسٹر شاہین باڈی بلڈر ایسوسی ایشن میرپور خاص کا حادثے سے متعلق ویڈیو بیان سامنے آیا ہے جس میں ان کا کہنا ہے کہ ہم میرپور خاص سے سندھ گیمز میں شرکت کے لیے آئے ہیں۔

ماسٹر شاہین کہتے ہیں کہ رہائش کے لیے ہمیں کمرے ملنے میں پریشانی ہورہی تھی تو دوسرے ایتھلیٹس کو میں نے ہوٹل بلایا، مجھ سے ملاقات کے لیے آنے والے کھلاڑیوں کو لفٹ میں گنجائش سے متعلق اندازہ نہیں تھا۔

انہوں نے کہا کہ لفٹ میں زیادہ افراد سوار ہونے کے باعث لفٹ گرگئی جب کہ لفٹ میں کم گنجائش کے حوالے سے ہوٹل انتظامیہ نے آگاہ کیا تھا۔

حادثے سے متعلق نگراں صوبائی وزیر کھیل جنید علی شاہ نے تصدیق کردی ہے، نگراں صوبائی وزیر کہتے ہیں کہ زخمیوں کی حالت بہتر ہے، ہماری پوری کوشش سندھ گیمز کا کامیاب انعقاد ہے۔

جنید علی شاہ نے کہا کہ چھوٹی لفٹ تھی ہوٹل انتظامیہ نے آگاہ کیا تھا، 3 افراد کی گنجائش والی لفٹ میں 8 سے 9 افراد داخل ہوئے۔