نیوزی لینڈ کے خلاف ٹی ٹوئنٹی سیریز سے قبل فٹنس کیمپ سے باہر ہونے پر شاہنواز دھانی کا ردعمل سامنے آگیا۔

پاکستان کرکٹ بورڈ (پی سی بی) نے فٹنس کیمپ کے لیے 29 کھلاڑیوں کے ناموں کا اعلان کیا ہے جو کہ 26 مارچ سے آرمی بیس کاکول میں ہونے جارہا ہے۔

یہ فٹنس کیمپ نیوزی لینڈ کے خلاف پانچ میچز کی ٹی ٹوئنٹی سیریز کی تیاریوں کا حصہ ہے۔

فٹنس کیمپ میں شامل نہ کرنے پر قومی فاسٹ بولر شاہنواز دھانی نے مایوسی کا اظہار کرتے ہوئے سماجی رابطے کی سائٹ ایکس پر ردعمل دیا۔

انہوں نے لکھا ’’مجھے کوئی پچھتاوا نہیں تاہم میں اس کیمپ کے بعد بھی سب سے فٹ بولر رہوں گا‘‘۔

خیال رہے کہ پانچ میچز کی ٹوئنٹی سیریز کے لیے نیوزی لینڈ کی ٹیم 14 اپریل کو اسلام آباد پہنچے گی جب کہ 18، 20 اور 21 اپریل کو تین ٹوئنٹی میچز راولپنڈی کے پنڈی اسٹیڈیم میں شیڈول ہیں۔

بعد ازاں بقیہ دو میچز کے لیے دونوں ٹیمیں لاہور پہنچے گی، جہاں 25 اور 27 اپریل کو قذافی اسٹیڈیم میں میچز کھیلے جائیں گے۔

فٹنس کیمپ میں شامل 29 کھلاڑیوں کے نام:

بابر اعظم، محمد رضوان، صائم ایوب، فخر زمان، صاحبزادہ فرحان، حسیب اللہ، سعود شکیل، عثمان خان، محمد حارث، سلمان علی آغا، اعظم خان، افتخار احمد، عرفان خان نیازی، شاداب خان، عماد وسیم اور اسامہ میر شامل ہیں۔

علاوہ ازیں محمد نواز، مہران ممتاز، ابرار احمد، شاہین شاہ آفریدی، نسیم شاہ، محمد عباس آفریدی، حسن علی، محمد علی، زمان خان، محمد وسیم جونیئر، عامر جمال، حارث رؤف اور محمد عامر کو بھی فٹنس کیمپ میں شامل کیا گیا ہے۔