پشاور: آسٹریلین جونیئر اسکواش چیمپئن شپ میں کھلاڑیوں کی بہترین کارکردگی پر وزیر اعلی خیبر پختونخوا نے مبارکباد پیش کی۔

وزیر اعلیٰ خیبر پختونخوا علی امین گنڈاپور کا کہنا ہے کہ آسٹریلین جونیئر اسکواش چیمپئن شپ میں خیبرپختونخوا کے بچوں اور بچیوں نے بہترین کارکردگی کا مظاہرہ کیا۔

انہوں نے کہا کہ چیمپئن شپ میں نمایاں کارکردگی پر ماہ نور علی، مہوش علی، فواد خان، یحیٰ خان اور ابراہیم زیب مبارکباد کے مستحق ہیں، ان کھلاڑیوں نے بین الاقوامی سطح پر ملک اور صوبے کا نام روشن کیا۔

وزیر اعلیٰ کا کہنا تھا کہ امید ہے یہ جونیئر کھلاڑی اسکواش کے میدان میں پاکستان کو اس کا کھویا ہوا مقام واپس دلانے میں کردار ادا کریں گے۔

علی امین گنڈاپور کہتے ہیں کہ چیئرمین پی ٹی آئی کے وژن کے مطابق کھیلوں کا فروع موجودہ صوبائی حکومت کی اہم ترجیحات میں شامل ہے۔ موجودہ صوبائی حکومت کھیلوں کے فروغ کے لئے مربوط اقدامات اٹھائے گی۔

وزیر اعلیٰ نے مزید کہا کہ کھیلوں کے شعبے میں باصلاحیت نوجوانوں کی بھرپور سرپرستی کی جائے گی اور کھیلوں کے فروغ کے لئے کھلاڑیوں کو ہر ممکن سہولیات فراہم کی جائیں گی۔