وزیراعلیٰ پنجاب مریم نواز نے صوبے میں شادیوں کی تقریبات میں ون ڈش پرسختی سے عمل درآمد کا حکم دے دیا۔

لاہور میں وزیر اعلیٰ پنجاب مریم نواز شریف کی زیر صدارت صوبائی کابینہ کا اجلاس ہوا، جس میں صوبائی وزرا، مشیروں، چیف سیکریٹری، آئی جی پنجاب پولیس، سیکریٹریز اور دیگر افسران نے شرکت کی اور اہم فیصلے کیے گئے۔

اجلاس کے بعد جاری اعلامیے کے مطابق کابینہ نے کینسر کے مریضوں کے لیے مفت ادویات کی فراہمی بحال کرنے کی منظوری دی اور صوبے میں مفت کینسر ادویات پراجیکٹ میں مزید مریض شامل کرنے پر بھی اتفاق کیا گیا۔

صوبائی کابینہ نے نواز شریف کسان کارڈ کے اجرا کی اصولی منظوری دی، گندم کے چھوٹے کاشت کار کو براہ راست نقد سبسڈی دینے کی تجویز کا بھی جائزہ لیا گیا۔

اجلاس کے دوران وزیر اعلیٰ مریم نواز شریف نے پنجاب بھر میں شادی کی تقریبات میں ون ڈش پر سختی سے عمل درآمد کا حکم دیا۔

صوبائی کابینہ نے پنجاب میں فراہمی اور نکاسی آب کے منصوبے لوکل گورنمنٹ ڈپارٹمنٹ کی اجازت سے مشروط کرنے پر اتفاق کیا گیا۔

صوبائی کابینہ نے اسموگ کے سدباب کے لیے اعلیٰ سطح کی کمیٹی کے قیام اور پنجاب اسمبلی کے پہلے پارلیمانی سال کے سالانہ کیلنڈر، صوبے میں تعلیم کا معیار اور رسائی پراجیکٹ کے مجوزہ نتائج کے حوالے سے مذاکرات اور یونیورسٹیوں میں وائس چانسلر کی تعیناتی کے لیے سرچ کمیٹی کے قیام کی منظوری دی۔