دنیا میں ایسے افراد کی کمی نہیں ہے جو کبھی کبھار آدھی رات میں جاگنے پر دوبارہ سونے کے لیے خاصی کوششیں کرتے ہیں اور اس طرح انہیں صبح بیدارہونے پر دن بھر کے معمولات کو انجام دینا مشکل ہوجاتا ہے۔

سینٹرز فار ڈیزیز کنٹرول اینڈ پریوینشن کے اعداد و شمار کے مطابق 2020 میں، 17 فیصد سے زیادہ بالغ افراد کو رات جاگنے پر دوبارہ سونے میں دشواری کا سامنا کرنا پڑا۔

ڈاکٹر بیکان لوو، جو کہ سان فرانسسکو کے نیند کے ماہر اور لومس ٹیک کے سی ای او ہیں اور جنہوں نے صحت مند نیند کو فروغ دینے کے لیے ایک اسمارٹ سلیپ ماسک تیار کیا ہے، نے رات نیند سے بیدار ہونے کی کچھ وجوہات اور علاج بتائے ہیں۔

لوو کے مطابق نیند میں خلل کے کچھ عام وجوہات میں تناؤ اور اضطراب، تکلیف یا درد،  ماحولیاتی رکاوٹیں جیسے شور، حرکت، یا بہت زیادہ گرم یا بہت ٹھنڈا درجہ حرارت شامل ہیں۔

نیند کے مسائل جیسے کہ نیند کی کمی یا بے خوابی اور ریسٹ لیس لیگ سنڈروم رات کے وقت جاگنے کا سبب بن سکتا ہے۔

اسی طرح جسم کے قدرتی نیند کے چکر میں خلل بھی نیند کی کمی کا باعث بن سکتا ہے۔

رات نیند سے جاگنے پر کیا کریں

اس حوالے سے لووکا کہنا ہے کہ جب آدھی رات میں آپ کی آنکھ کھل جائے تو کوشش کریں کہ بستر پر ہی رہیں، آرام کرنے کی کوشش کریں، اور دیکھیں کہ کیا آپ دوبارہ سو سکتے ہیں۔ ساتھ ہی ایسی تکنیکوں کو آزمائیں جو آپ کو آرام دہ محسوس کرانے میں مفید ثابت ہوں جیسے سانس لینے کی مشقش۔

لوو نے مزید کہا کہ اگر آپ 10 یا 15 منٹ کے بعد دوبارہ سو نہیں سکتے، تو یہ وقت بستر سے اٹھنے کا ہے۔

گھر میں کسی پُرسکون اور آرام دہ جگہ پر جانے کی کوشش کریں، جیسے صوفے، اور ایک پرسکون، کم محرک سرگرمی میں مشغول رہیں، جیسے کتاب پڑھنا یا کوئی پرسکون سرگرمی کرنا، جب تک کہ آپ کو دوبارہ نیند نہ آنے لگے۔

ان غلطیوں سے بچنے کی کوشش کریں

لوو کا کہنا ہے کہ اگرآپ جاگ جاتے ہیں تو فون کے استعمال سے گریز کریں اس طرح آپ کو دوبارہ نیند نہیں آئے گی رات جاگتے رہنے کی یہ سب سے عام غلطی ہے چاہے وقت جاننے کے لیے ہی فون کو کیوں نہ دیکھا جائے۔

آدھی رات کو جاگنا آپ کے جسم کی اندرونی گھڑی کا آپ کے نیند کے شیڈول کے مطابق نہ ہونے کا نتیجہ ہو سکتا ہے۔

ماہرین کے مطابق نیند کے لیے دو اہم عوامل کام کرتے ہیں ان میں سے پہلا رات کے وقت دن بھر کام کی تھکن کی وجہ  سے جسم کو آرام کی ضرورت ہوتی ہے یہ ایک دباؤ کی طرح ہوتا ہے جو سونے میں مدد دیتا ہے جبکہ دوسرا  رات میں جسم کی اندرونی گھڑی، جسے سرکیڈین سگنلنگ کہا جاتا ہے، نیند کو برقرار رکھنے میں اہم کردار ادا کرتا ہے۔

لوو نے کہا کہ رات کی پرسکون نیند کے لیے یہ دونوں عوامل مل کر کام کرتے ہیں۔ لیکن اگر نیند کا دباؤ سرکیڈین سگنل کے مکمل طور پر شروع ہونے سے پہلے ختم ہوجاتا ہے، تو یہ رات کو جاگنے کا باعث بن سکتا ہے۔

اگر آپ کو یقین نہیں ہے کہ آپ رات کے وقت کیوں جاگ رہے ہیں، تو آپ اپنی اندرونی گھڑی کو ایڈجسٹ کرنے پر غور کر سکتے ہیں تاکہ یہ دیکھیں کہ آیا اس سے ان رکاوٹوں کو کم کرنے میں مدد ملتی ہے۔

اپنے سرکیڈین تال کو ایڈجسٹ کرنے کے لیے ہر روز ایک ہی وقت پر جاگنا، کھانے کے اوقات میں تبدیلی کرنا، میلاٹونین سپلیمنٹس لینا، دن کے مختلف اوقات میں ورزش کرنا، اور صبح کے وقت معتدل مقدار میں کیفین کا استعمال شامل ہیں ۔