جن افراد کے گھر کی سیڑھیوں پر قالین بچھا ہو یا لکڑی سے بنا ہو تو اسے ویکیوم کلینر سے صاف کرنا ایک دردِ سر ہوتا ہے۔ لیکن اب مائیگو روبوٹ کلینر آپ کی یہ مشکل حل کرسکتا ہے۔ یہ روبوٹ بہت تیزی سے سیڑھیاں چڑھ کر ان کے کنارے تک آسانی سے صاف کرسکتا ہے۔

فی الحال انٹرنیٹ چندے کی ویب سائٹ  کک اسٹارٹر پر اس کی کراؤڈ فنڈنگ جاری ہے اور ایڈیٹر نے اسے ایک بہترین پروجیکٹ قرار دیا ہے۔ اس کا سکشن پاور 9700 پی اے ہے اور جھاڑو لگانے کی قوت 17 نیوٹن تک ہے۔ مائیگو نامی یہ روبوٹ اپنا کام کرکے خود ایک ڈاک اسٹیشن میں چلا جائے گا جہاں چارجنگ سے اپنی توانائی پوری کرے گا۔

ایک مرتبہ چارج ہونے پر یہ 500 مربع میٹر تک صفائی کرسکتا ہے۔ اس میں لیڈار اور دیگر حساس سینسر اسے بھٹکنے یا ٹکرانے سے بچاتے ہیں۔ یہاں تک کہ یہ ہر رکاوٹ نظر انداز کرکے آگے بڑھتا ہے۔

اس ایجاد کے کئی نمونے یا پروٹوٹائپ بن چکے ہیں جن کی آزمائش جاری ہے۔ پہلے مرحلے میں 1000 روبوٹ خاکروب بنائے جائیں گے جن کی سپلائی جون 2024 میں شروع ہوگی۔ اس روبوٹ کی تعارفی قیمت 849 ڈالر رکھی گئی ہے ۔