لمبے، گھنے، سلکی اور مضبوط بالوں کی خواہشمند خواتین خوبصورت بالوں کے لیے پارلر سے مہنگے ٹریٹمنٹس کرواتی ہیں جن کے نتائج تسلی بخش اور زیادہ پائیدار نہیں ہوتے۔

آج ہم آپ کو ایسے گھریلو ٹو ٹکے بتا رہے ہیں جن کی بدولت چند ہفتوں میں ہی بالوں کی لمبائی میں واضح طور پر اضافہ کیا جا سکتا ہے۔

آملہ کے فوائد اوراستعمال

بالوں کی بہترین نشوونما کے لیے آملہ کا استعمال کئی دہائیوں سے کیا جا رہا ہے جس کے نتائج بھی بہترین سامنے آتے ہیں۔

 وٹامن سی سے بھر پور آملہ کے استعمال سے بالوں کی افزائش کے عمل میں تیزی آتی ہے۔

آملہ میں موجود اینٹی آکسیڈنٹ بالوں کی افزائش کے لیے لازم ملزوم ہارمونز کی افزائش میں مدد فراہم کرتا ہے۔

آملہ پیس کر بالوں میں لگانے سے ڈائے اور اسٹریٹنر کے استعمال سے متاثر بالوں کو صحت مند ہونے میں مدد ملتی ہے۔

آلو کا استعمال

آلو کا رس ، اس سے بال صحت مند اور تیزی سے لمبے ہوتے ہیں۔

آلو کارس نا صرف بالوں کی افزائش کو بڑھاتا ہے بلکہ یہ روکھے، بے جان بالوں کا علاج بھی ہے۔

آلو وٹامن اے، بی اور سی سے بھرپور ہوتا ہے جبکہ یہ وٹامنز بالوں کے لیے ضروری سمجھے جاتے ہیں ۔

 دو سے تین آلوؤں کا رس نکال کر اس میں ا یک انڈے کی زردی اور ایک چمچ شہد ملاکر بالوں پر لگائیں اور 30 منٹ بعد بال دھو لیں۔

پیاز کا رس اور استعمال

پیاز تقریبا روزانہ ہر قسم کے کھانوں میں استعمال ہوتا ہے۔

کھانوں کے علاوہ پیاز کے خوبصورتی میں اضافے کے لیے بھی بے شمار استعمال ہیں، جیسے پیاز بالوں کی لمبائی بڑھانے کا نہایت عمدہ ذریعہ ہے، سلفر سے بھر پور پیاز کے رس کے استعمال سے بالوں کی لمبائی تیزی سے بڑھتی ہے۔

دو پیازوں کا رس نکال کر اس کا بالوں کی جڑوں سے لے کر سروں تک اسپرے کر لیں، 5 منٹ کے لیے اب اس سے مالش کریں اور 1 گھنٹے کے لیے چھوڑ دیں، بعد ازاں بالوں کو کسی اچھے سے شیمپو سے دھو لیں۔

انڈا بالوں کی بہترین نشوونما کیلئے ضروری

پروٹین سے بھر پور انڈے میں بالوں کی بہترین نشوونما کے لیے ضروری وٹامنز اور منرلزپائے جاتے ہیں۔

ایک سے دو انڈوں کی سفیدی لیں اب اس میں ایک چمچ زیتون کا تیل اور ایک چمچ شہد ملا کر بالوں کی جڑوں میں مالش کریں اور بالوں کو 30 منٹ کے لیے باند ھ دیں، اس کے بعد بال شیمپو کر لیں۔

بالوں کی صحت برقرار رکھنے اور لمبائی بڑھانے کے لیے ان سستے،کار آمد گھریلو ٹوٹکوں کا استعمال باقاعدگی سے کریں۔