پاکستان سپر لیگ (پی ایس ایل) کے گروپ میچز کا پہلا مرحلہ تقریباً اپنے اختتام کو پہنچ گیا ہے۔ ملتان اور کراچی میں کھیلے گئے میچز میں کوئٹہ گلیڈی ایٹرز اور کراچی کنگز نے اپنا اثر چھوڑنے کے لیے بڑی جدوجہد کی ہے۔

کنگز نے پانچ میچ کھیلے ہیں، ان میں سے چار میں انہیں شکست ہوئی جب کہ روایتی حریف لاہور قلندرز کے خلاف فتح درج کرانے میں کامیاب رہے۔ کنگز کے دستے میں واحد جنگجو ان کے کپتان عماد وسیم رہے ہیں۔

دریں اثنا، گلیڈی ایٹرز کی حالت افسوس ناک ہے۔ کبھی مقابلے کی سب سے زیادہ مستقل مزاج رہنے والی ٹیم، اب پوری طرح بکھری ہوئی نظر آرہی ہے۔ ان کے پاس جیسن رائے، مارٹن گپٹل، افتخار احمد، محمد حفیظ، عمر اکمل اور سرفراز احمد کے ساتھ طویل بیٹنگ لائن ہے لیکن ان میں سے کوئی بھی اسکور نہیں کر پا رہا۔ دوسری جانب ان کے پاس پاکستان کے دو بہترین نوجوان تیز گیند باز نسیم شاہ اور محمد حسنین ہیں لیکن پھر بھی وہ اپنی ٹیم کو کسی خاص کامیابی سے ہمکنار نہیں کر سکے۔

گلیڈی ایٹرز نے چار میچ کھیلے، تین میں شکست ہوئی اور کراچی کنگز کے خلاف صرف ایک مقابلہ جیتا۔

دوسری جانب لاہور قلندرز اور پشاور زلمی نے اپنے میچوں میں شاندار کارکردگی کا مظاہرہ کیا ہے۔ دفاعی چیمپئنز کے لیے، ان کا بولنگ کا شعبہ ان فارم کپتان شاہین شاہ آفریدی، حارث رؤف اور افغانستان کے اسپن جادوگر راشد خان کی طرح شاندار ہے۔ ان کی بیٹنگ بہترین نہیں رہی جس کی وجہ سے ان کی ترقی سست روی کا شکار ہے۔ موجودہ چیمپیئن نے اب تک کھیلے گئے تین میں سے دو میچ جیتے اور ایک ہارا۔

بابر اعظم کی زلمی بھی متضاد رہی۔ محمد حارث اور صائم ایوب ٹاپ آرڈر میں بے حد متاثرکن رہے ہیں، جبکہ کپتان ابھی تک وہ مستقل مزاجی حاصل نہیں کر پائے ہیں جس کے لیے وہ مشہور ہیں۔ ٹام کوہلر کیڈمور بھی قابل ذکر رہے ہیں لیکن ان کی سب سے بڑی پریشانی ان کا بولنگ شعبہ رہا ہے۔ وہاب ریاض کے علاوہ ان کا کوئی بھی فاسٹ باؤلر اپنی فارم حاصل نہیں کر پا رہا ہے جب کہ اسپنرز کا بھی یہی حال ہے۔ انہوں نے چار میچ کھیلے، دو جیتے اور دو ہارے۔

دریں اثنا، دو بار کے پی ایس ایل چیمپئنز اپنے بولنگ کے شعبے میں جدوجہد کر رہے ہیں لیکن بلے سے خاص رہے ہیں۔ کولن منرو، پال اسٹرلنگ، اعظم خان، آصف علی، شاداب خان اور رحمن اللہ گرباز کی بدولت ان کے پاس گہری اور دھماکہ خیز بیٹنگ لائن ہے۔ اس کے علاوہ انگلینڈ کے ایلکس ہیلز اور معین علی ابھی تک اسکواڈ میں شامل نہیں ہوئے ہیں۔ شاداب کی قیادت میں ٹیم نے تین میچ کھیلے، دو جیتے اور ایک ہارا۔

مجموعی طور پر، ٹورنامنٹ میں اب تک ایک ٹیم جو مضبوط دکھائی دے رہی ہے وہ ہے ملتان سلطانز۔ ان کی ٹیم میں بڑے ستارے کم ہیں، لیکن ان کے پاس ایک متوازن پلیئنگ الیون ہے، جو ایک دوسرے کی بہت اچھی طرح تکمیل کرتی ہے۔

آئیے سلطانوں پر گہرائی سے نظر ڈالیں اور معلوم کریں کہ انہیں کیا چیز خاص بناتی ہے۔

ٹاپ آرڈر

کپتان محمد رضوان اور سابق کپتان شان مسعود نے پی ایس ایل 2021ء کے چیمپئنز کی دوڑ کے لیے اننگز کا آغاز کیا۔ وہ اپنی ٹیم کی دھماکہ خیز بیٹنگ لائن کے لیے ایک ٹھوس پلیٹ فارم مہیا کرتے ہیں۔

وکٹ کیپر بلے باز محمد رضوان شاندار فارم میں ہیں، 109 اعشاریہ 66 کی اوسط سے (کراچی کنگز کے خلاف کھیل سے پہلے) 144 اعشاریہ 29 کے اسٹرائیک ریٹ سے رنز بنا رہے ہیں۔ 30 سالہ کھلاڑی نے ٹورنامنٹ میں اب تک 329 رنز بنائے ہیں، انہیں ٹورنامنٹ کے دوسرے سب سے زیادہ رنز بنانے والے کھلاڑی ریلی روسو کے خلاف 111 رنز کی برتری حاصل ہے، جنہوں نے 218 رنز بنائے ہیں۔

دائیں ہاتھ کے بلے باز نے اس سیزن میں اپنی پہلی پی ایس ایل سنچری، کراچی کنگز کے خلاف، ایک مشکل بیٹنگ پچ پر محض 60 گیندوں پر بنائی۔

دوسری طرف، بائیں ہاتھ کے بلے باز کی کارکردگی بہترین نہیں ہے، لیکن اب وہ اپنی فارم واپس حاصل کرنے کے خواہاں ہیں۔ کویت میں پیدا ہونے والے بلے باز نے نصف سنچری کی مدد سے اب تک 112 رنز بنائے ہیں۔

جب رضوان یا مسعود کو آؤٹ کیا جاتا ہے تو ان کی جگہ جنوبی افریقہ کے روسو لے لیتے ہیں اور وہ بھی شاندار فارم میں ہیں۔ جیسا کہ اوپر بتایا گیا ہے، وہ اس وقت ٹورنامنٹ میں دوسرے سب سے زیادہ رنز بنانے والے کھلاڑی ہیں اور وہ یہ رنز 168 اعشاریہ 99 کے حیران کن اسٹرائیک ریٹ سے بنا رہے ہیں۔

ٹھوس مڈل آرڈر

اس کے بعد روسو کے پروٹیز ٹیم کے ساتھی ڈیوڈ ملر ہیں، جو پوری دنیا میں اپنی بھڑکیلے پن کے لیے جانے جاتے ہیں۔ بائیں ہاتھ کے بلے باز کو اپنی پاور ہٹنگ کی مہارت کو نمائش کے لیے پیش کرنے کا زیادہ موقع نہیں ملا کیونکہ وہ ٹورنامنٹ میں اب تک صرف 59 گیندوں کا سامنا کر سکے ہیں۔ پھر بھی، انہوں نے 169 اعشاریہ 49 کے اسٹرائیک ریٹ سے 50 کی اوسط سے 100 رنز بنائے ہیں۔ یقینی طور پر جب انہیں کریز پر مناسب وقت ملے گا تو وہ مخالف بولنگ لائن کو بھرپور نقصان پہنچائیں گے۔

جنوبی افریقی جوڑی کے بعد، کیریبین کے دیو کیرون پولارڈ بیٹنگ کے لیے میدان میں آتے ہیں۔ ملر کی طرح، انہوں نے بھی حالیہ مہم کے دوران زیادہ گیندوں کا سامنا نہیں کیا ہے کیونکہ سرفہرست تین بلے باز بیٹنگ آرڈر کے نیچے والے بلے بازوں کے لیے بہت کم وقت چھوڑتے ہیں۔

دنیا کے سب سے تجربہ کار ٹی ٹوئنٹی کھلاڑی نے 41 گیندوں کا سامنا کیا، جس پر انہوں نے 168 اعشاریہ 29 کے اسٹرائیک ریٹ سے 69 رنز بنائے۔

ان تینوں کے علاوہ خوشدل شاہ لائن اپ میں موجود ہیں، جنہیں اکثر پاکستان کے درمیانی اوورز میں سب سے طاقتور ہٹر سمجھا جاتا ہے۔ اس کے بعد ویسٹ انڈیز کے کارلوس بریتھویٹ کا نام آتا ہے، جو بین اسٹوکس کو لگاتار چار چھکے مار کر اپنی ٹیم کو دوسرا ورلڈ ٹی ٹوئنٹی ٹائٹل جتوانے کے بعد نمایاں ہوئے تھے۔

یہاں تک کہ اگر اوپنرز، رضوان اور مسعود پاور پلے میں تیزی سے اسکور کرنے میں ناکام رہتے ہیں، تو سلطانوں کو درمیانی اوورز میں اسٹرائیک ریٹ کو بہتر کرنے میں کسی خاص دشواری کا سامنا نہیں کرنا پڑے گا، اس لیے کہ وہ مڈل آرڈر میں بے مثال طاقت رکھتے ہیں۔

اسٹرائیک باؤلرز

ملتان سلطانز کو اس وقت زبردست دھچکا لگا جب ان کے پریمیئم فاسٹ باؤلر، ہمیشہ مسکراتے رہنے والے شاہنواز دہانی ٹورنامنٹ کے اوائل میں فریکچر کی وجہ سے ٹورنامنٹ سے باہر ہو گئے۔ ماہرین نے سلطان کی باؤلنگ لائن کو کمزور اور ناتجربہ کار قرار دیا تھا۔ بہت سے لوگوں نے تو ان کی باؤلنگ کی پریشانیوں کی وجہ سے اس ٹیم کے ٹورنامنٹ سے باہر ہونے کی پیش گوئی کر دی تھی۔

تاہم، ان قیاس آرائیوں اور اداسیوں کے درمیان، ایک نوجوان نے قدم بڑھایا اور راستہ دکھایا۔

20 سالہ فاسٹ باؤلر احسان اللہ نے کوئٹہ گلیڈی ایٹرز کے خلاف محض 12 رنز کے عوض پانچ وکٹیں لے کر دنیا کو ایک مضبوط پیغام دیا۔ وہ تیز، جارحانہ اور اچھی لائن اور لینتھ کے ساتھ باؤلنگ کرتے ہیں۔

نوجوان تیز گیند باز نے اب تک صرف پانچ میچوں میں 5 اعشاریہ 54 کے اکانومی ریٹ سے 12 وکٹیں حاصل کی ہیں۔ کراچی کنگز کے خلاف میچ میں، جہاں عماد وسیم کی قیادت میں ٹیم نے 196 کے ہدف کا تعاقب کرتے ہوئے 193 رنز بنائے، احسان اللہ کے علاوہ سلطانز کے تمام گیند باز رنز روکنے میں ناکام رہے، انہوں نے اپنے چار اوورز کے کوٹے میں صرف 17 رنز دیے۔

وہ اس کھیل میں ایک بڑا فرق ثابت ہوئے، جس کی بدولت رضوان کو اپنی سابقہ فرنچائز کے خلاف قیمتی فتح نصیب ہوئی۔

ملتان سلطانز کے لیے ایک اور ٹرمپ کارڈ ان کے لیگ اسپنر اسامہ میر رہے ہیں۔

طویل قامت لیگ اسپنر، جنہوں نے حال ہی میں پاکستان کے لیے اپنا ڈیبیو کیا تھا، اپنی ٹیم کے لیے اہم کردار ادا کر رہے ہیں، انہوں نے رنز دینے کی کم اوسط کے ساتھ اہم وکٹیں حاصل کیں۔

سیالکوٹ میں پیدا ہونے والے باؤلر فی الحال صرف 6 اعشاریہ 70 کے اکانومی ریٹ سے نو وکٹوں کے ساتھ ایونٹ میں تیسرے سب سے زیادہ وکٹیں لینے والے باؤلر ہیں۔ایک اور نوجوان جو رضوان کے لیے ڈیلیور کر رہے ہیں وہ عباس آفریدی ہیں۔ دائیں ہاتھ کے فاسٹ باؤلر رنز کے اعتبار سے مہنگے ثابت ہوئے لیکن انہوں نے اپنی وکٹ لینے کی صلاحیت سے اپنے ساتھی کھلاڑیوں احسان اللہ اور میر کا ساتھ دیا۔وکٹ لینے والوں کے چارٹ پر دوسرے نمبر پر ہونے کی وجہ سے، انہوں نے چار میچوں میں 10 بلے بازوں کو آؤٹ کیا، 9 اعشاریہ 90 کے زیادہ اکانومی ریٹ سے رنز دیے۔

باؤلنگ کے اضافی اختیارات

احسان اللہ، عباس اور میر، رضوان کے ترجیحی باؤلر رہے ہیں۔ مزید یہ کہ رضوان کے پاس باؤلنگ کے اختیارات میں مزید ہتھیار موجود ہیں جو کھیل کے کسی بھی مرحلے پر استعمال کیے جا سکتے ہیں۔

پولارڈ ہاتھ میں گیند کے ساتھ ایک ہوشیار کھلاڑی ہیں۔ وہ اپنی درست باؤلنگ اور دھیمے گیندوں کو ملا کر رنز کے بہاؤ کو روک سکتے ہیں۔ جب وہ بولنگ پر ہوں تو اہم وکٹیں لینے کی صلاحیت رکھتے ہیں۔

پولارڈ کی ونڈیز ٹیم کے ساتھی براتھویٹ بھی اپنا بازو گھمانا جانتے ہیں۔ وہ میڈیم پیس کے ساتھ گیند کرتے ہیں اور اپنی تیز رفتار تبدیلی سے بلے بازوں کو بیوقوف بنا سکتے ہیں۔ ضرورت پڑنے پر وہ ایک یا دو اہم اوور کر سکتے ہیں۔

دریں اثنا، خوشدل، جو اپنی پاور ہٹنگ کے لیے مشہور ہیں، گیند کے ساتھ ایک کارآمد مہم جو بھی ہیں۔ رضوان نے گزشتہ ایڈیشنز میں ان کی باؤلنگ کی مہارت کو چالاکی سے استعمال کیا ہے اور وہ اس سیزن میں بھی ایسا کر سکتے ہیں۔

درحقیقت، کراچی کنگز کے خلاف، انہوں نے کھیل کے تناظر میں ایک شاندار اسپیل کیا، صرف 25 رنز دے کر اپنے چار اوورز کے کوٹے میں ایک اہم وکٹ حاصل کی۔

مختصراً، ملتان سلطانز ایسے کھلاڑیوں کی طرح نظر آتی ہے جو اپنے اپنے حصے کو کمال تک پہنچا رہے ہیں اور ٹیم کی کامیابی میں اپنا کردار ادا کر رہے ہیں۔

رضوان بلے بازی اور کپتان کے طور پر شاندار رہے ہیں۔ وہ آسانی کے ساتھ رنز بنا رہے ہیں اور قائد کی حیثیت سے اپنے وسائل کو مہارت سے استعمال کر رہے ہیں۔

اس طرح ٹورنامنٹ میں اب تک ملتان سلطانز ایک ایسی ٹیم دکھائی دیتی ہے جسے شکست دینا مشکل ہے۔

اس کے باوجود، ابھی بہت سارے میچ کھیلے جانے باقی ہیں اور کسی ٹیم کے لیے صرف ایک اچھا میچ یا کسی ٹیم کو اپنی کارکردگی کو الٹا کرنے کے لیے ایک برا میچ درکار ہوتا ہے۔

کرکٹ ایک مزیدار کھیل ہے اور اس میں رفتار کا اہم کردار ہے۔ آپ یقین سے نہیں کہہ سکتے کہ ملتان سلطان کب اپنا سنہری لمس کھو سکتے ہیں یا کراچی کنگز یا کوئٹہ گلیڈی ایٹرز اپنی فارم میں واپس آسکتے ہیں۔