وزیراعظم عمران خان نے کہا ہے کہ افغانستان میں امریکا کی ناکامی کا الزام پاکستان پر لگانا نا انصافی ہے۔

روسی ٹی وی سے  گفتگو  کرتے ہوئے وزیر اعظم نے کہا کہ نائن الیون کے بعد امریکا کی جنگ نہ لڑتے تو آج  پاکستان دنیا کا خطرناک ملک نہ ہوتا۔

 وزیر اعظم عمران خان نے بتایا کہ پاکستان نے 70 ہزار جانیں گنوائیں اور معیشت کو 100 ارب ڈالر کا نقصان بھی ہوا جبکہ پاکستان کو امریکا کی اس جنگ میں غیر جانبدار رہنا چاہیے تھا۔

انہوں نے مزید کہا کہ سوویت یونین کے خلاف جنگ میں انہی لوگوں کو تربیت دی گئی، جس کا فنڈ سی آئی اے نے دیا تھا جبکہ یہ تربیت یافتہ لوگ تھے اور ایک مدت بعد جب امریکا وہاں گيا تو کہا گيا کہ یہ جہاد نہیں یہ دہشت گردی ہے۔

انہوں نے مزید کہا کہ آخر میں امریکا افغانستان میں اپنی ناکامی پر مورد الزام ہمیں ٹھہراتا ہے۔

وزیر اعظم عمران خان نے بتایا کہ امریکی صدر ڈونلڈ ٹرمپ نے افغانستان کے ساتھ مذاکرات معطل کرنے کا اعلان سماجی رابطے کی ویب سائٹ ٹوئیٹر میں کیا تھا جسکی بنیادی وجہ افغانستان حملے میں امریکی اہلکار کی ہلاکت تھی اور ان سب میں پاکستان کو تمام ناکامیوں کا الزام دینا محض ناانصافی ہے۔