وزیراعظم عمران خان نے کہا ہے کہ پاکستان اور بھارت کے درمیان امن قائم ہوگا تو پھر ملکی وسائل غریبوں  پر خرچ ہوں گے۔

سوئٹزرلینڈ کے شہر ڈیووس میں جاری عالمی اقتصادی فورم  کی سائیڈ لائن پر بین الاقوامی میڈیا کونسل  سے گفتگو کرتے ہوئے کہا کہ اگر پاکستان اور بھارت کے درمیان جنگ ہوئی تو بہت تباہ کن ہوگی، امن ہوگا تو  ہی ملکی وسائل غریب پر خرچ ہو سکیں گے۔

ان کا کہنا تھا کہ  میں نے حکومت میں آتے ہی بھارتی وزیر اعظم مودی سے رابطہ کیا،جس کا جواب بھونڈے طریقے سے دیا گیا۔ان سے کہا جو پیسہ دشمنی پر خرچ کرتے ہیں وہ غربت کے خاتمے پر کریں۔

عمران خان نے  کہا کہ ہم بھارت کے ساتھ تمام تنازعات کا پرامن حل چاہتے ہیں، افسوس کی بات ہے تعاون کے جواب میں ہم پر بم برسائے گئے۔

وزیراعظم عمران نے کہا کہ اگر بھارت میں متنازع قانون کے خلاف احتجاج بڑھا تو توجہ لائن آف کنٹرول (ایل او سی)سے ہٹ جائے گی ۔

انہوں نے کہا کہ ہماری حکومت سرحدی علاقوں کی بحالی کر رہی ہے، اقوام متحدہ کے مبصرین کو علاقے کا دورہ کرنا چاہیے، مودی نے 80 لاکھ کشمیریوں کو کئی ماہ سے محصور کیا ہوا ہے۔

وزیراعظم عمران خان سے یوٹیوب کی سی ای او سوزن ووجکیکی کی ملاقات

وزیراعظم عمران خان نے کہا کہ امریکی صدر سے بھی کشمیر کی صورت حال پر بات کی ہے، ایل او سی پر کشیدگی کسی بڑے حادثے کا سبب بن سکتی ہے۔

بھارت سے متعلق وزیراعظم کا کہنا تھا کہ پاکستانی کی حیثیت سے جتنا بھارت کو میں سمجھتا ہوں کوئی نہیں سمجھتا، بھارت میں میرے بہت سارے دوست ہیں۔

عمران خان کا مزید کہنا تھا کہ افغانستان کی صورتحال پاکستان  پر اثر انداز ہوتی ہے۔ افغانستان میں امن ہوگا تو وسط ایشیا تک تجارت ممکن ہوگی۔ میں نے ہمیشہ طاقت کےاستعمال کی مخالفت کی ہے، میرے اسی مؤقف کی وجہ سے مجھے طالبان کا حامی بھی کہا گیا۔

ان کا کہنا تھا پاکستانی حکومت کو پاک فوج کی مکمل حمایت حاصل ہے جبکہ خارجہ پالیسی کو فوج سمیت تمام ریاستی اداروں کی حمایت ہے۔