وزیراعظم کی معاون خصوصی برائے اطلاعات ونشریات ڈاکٹر فردوس عاشق اعوان نے کہا ہے کہ حکومتی پالیسیوں کی بدولت ملک معاشی بحرانوں سے نکل رہا ہے،خوشحال ، مستحکم اور ترقی یافتہ پاکستان پی ٹی آئی  حکومت کا وژن ہے۔

 تفصیلات کے مطابق وزیراعظم کی معاون خصوصی برائے اطلاعات ونشریات ڈاکٹر فردوس عاشق اعوان نے  سیالکوٹ میں ایک عوامی جلسے سے خطاب کرتے ہوئے کہا کہ عمران خان نے اداروں کو طاقتور مافیا کے چنگل سے نکال کر آزاد کیا ہے۔

تقریب سے خطاب کرتے ہوئے ڈاکٹر فردوس عاشق اعوان نے کہا کہ اسمگلنگ کی روک تھام میں ناکام کسٹمز کے اعلی افسران کے خلاف تحقیقات کا آغاز اور ان کو عہدوں سے ہٹانا نئے پاکستان کی واضح جھلک ہے۔

وزیراعظم کی معاون خصوصی برائے اطلاعات ونشریات نےیہ بھی کہا کہ پی ٹی آئی  کی حکومت میں اداروں  پر قانون کا یکساں اطلاق ہو رہا ہے جبکہ قانون شکن عناصر کو بلا امتیاز قانون کی گرفت میں لانے کا عمل  بھی تیزی سے جاری ہے،عوام دشمن مافیہ سے آہنی ہاتھوں سے نمٹا جائے گا۔

نوجوانوں کیلئے روزگار کی فراہمی حکومت کی ترجیح ہے، فردوس عاشق اعوان

ڈاکٹر فردوس عاشق اعوان  کا کہنا تھا کہ ایف آئی اے سارے معاملے کی تحقیقات کرے گا،گندم کی کوئٹہ اور طورخم بارڈر پر سمگلنگ کی روک تھام میں ناکام اور ملوث افسران کی نشاندھی کر کے ان کے خلاف کارروائی کا  بھی آغازکر دیا گیا ہے۔

فردوس عاشق اعوان  نے کہا کہ پی ٹی آئی  حکومت عوام بالخصوص دیہی علاقوں میں رہنے والے لوگوں کوان کی دہلیز پر تمام بنیادی سہولیات فراہم کر کے ان کا معیار زندگی بہتر بنانے کے لئے پرعزم ہے دیہی علاقوں میں رہنے والے عوام قومی ترقی میں بنیادی کردار ادا کر رہے ہیں۔

کشمیر کے بارے میں ڈاکٹر فردوس عاشق اعوان نے کہا کہ مقبوضہ کشمیر کے مظلوم عوام کی بھارتی تسلط سے آزادی کی جدوجہد جلد رنگ لائے گی۔

وزیراعظم کی معاون خصوصی برائے اطلاعات ونشریات ڈاکٹر فردوس عاشق اعوان نے  مزید کہا کہ پانچ فروری کو محصور کشمیری بھائیوں کے ساتھ یوم یکجہتی کے طور پر منایا جائیگا، پاکستان حق خودارادیت کے لئے کشمیریوں کی جدوجہد میں ہمیشہ ان کے ساتھ کھڑا رہے گا۔