معاون خصوصی ڈاکٹر فردوس عاشق اعوان کا کہنا ہے کہ وزیراعظم نے فوڈ سپلائی چین بحال اورگڈز ٹرانسپورٹ کی رکاوٹیں دور کرنے کی بھی ہدایت کر دی ہے۔
تفصیلات کے مطابق کابینہ اجلاس کے بعد بریفنگ دیتے ہوئے معاون خصوصی فردوس عاشق اعوان نے بتایا کہ پاکستان میں کورونا وائرس کے اٹھارہ سو پینسٹھ کیسز ہیں جن میں سے اٹھاون مریض صحت یاب ہو چکے ہیں جبکہ اب تک پچیس افراد اس مرض کے ہاتھوں جان سے جا چکے ہیں۔
انہوں نے بتایا کہ وفاقی کابینہ نے وزیراعظم کے بارہ سوارب روپے کے ریلیف پیکیج اور سکوک بانڈ ز کے اجرا کی منظوری دے دی ہے۔
ڈاکٹر فردوس کا کہنا تھا کہ پاکستان میں کورونا وائرس کے اٹھارہ فیصد کیسز دیگر ممالک سے آئے جبکہ تینتیس فیصد لوکل ٹرانسمیشن کے ہیں جبکہ وزیراعظم نے ہدایت کی کہ کورونا مریضوں کے ساتھ مجرموں والا سلوک نہ کیا جائے۔
فردوس عاشق اعوان نے کہا کہ کابینہ نے ای سی سی کے فیصلوں کی توثیق کردی ہے۔ اسلامی بینکاری کے فروغ کیلئے تین سال کی مدت کیلئے سکوک بانڈز کے باقاعدہ اجراء اور پندرہ بین الاقوامی پروٹوکول کنونشن کی منظوری بھی دی گئی ہے۔
معاون خصوصی نے کہا کہ وزیراعظم نے کورونا وائرس کے حوالے سے کابینہ کو اعتماد میں لیا اور اس وباء پر قابو پانے کیلئے دو توجیہی حکمت عملی اپنانے کو کہا۔ کابینہ اجلاس میں چاروں صوبوں میں گڈز ٹرانسپورٹ کھولنے کا فیصلہ ہوا۔
فردوس عاشق اعوان نے مزید کہا کہ وزیراعظم نے بھٹہ مزدوروں کے بنیادی حقوق کے تحفظ کو یقینی بنانے، ریلوے، ایف بی آر، پی آئی اے میں اصلاحات لانے اور اداروں میں ای گورننس کے فروغ کی ہدایت کی
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News