صوبہ سندھ اور پنجاب میں کورونا وائرس کے مزید 90  کیسز کی تصدیق ہوئی ہے جس کے بعد ملک بھر میں متاثرہ افراد کی تعداد 1198 ہوگئی ہے ۔

تفصیلات کے مطابق آج  صوبہ سندھ اور پنجاب میں کورونا وائرس کے مزید 90 کیسز سامنے آچکے ہیں جن میں سے 82 مریض پنجاب جبکہ سندھ میں 8 مریض سامنے آئے ہیں۔

ترجمان محکمہ صحت سندھ سے جاری کردہ بیان کے مطابق سندھ میں کورونا وائرس کے مزید 8کیسز سامنے آئے ہیں جس کے بعد صوبے میں کل کیسز کی تعداد 421 تک پہنچ چکی ہے۔

ترجمان محکمہ صحت سندھ نے کہا کہ آج کراچی میں کورونا وائرس کےمزید 7 مریض سامنےآ گئے جبکہ حیدرآباد سے کرونا وائرس کا ایک اور مریض سامنے آگیا۔

ترجمان محکمہ صحت سندھ نے یہ بھی کہا کہ کراچی سے رپورٹ ہونے والے مریضوں کی مجموعی تعداد 154  ہو گئی ہے ،حیدرآباد سے 2 ، دادو میں ایک جبکہ سکھر میں کل متاثرہ افراد کی تعداد 265 تک جاپہنچی ہے۔

ترجمان محکمہ صحت نے مزید کہا کہ سندھ میں 14  مریض صحت یاب ہوئے ہیں اور  ایک مریض کا انتقال ہوچکا ہے جبکہ کراچی میں ایک سو 41 مریض زیر علاج ہیں۔

دوسری جانب ترجمان پرائمری اینڈ سکینڈری ہیلتھ کئیر نے بھی اپنے ایک بیان میں کہا کہ پنجاب میں کوروناوائرس کے مزید 82 کیسز سامنے آگئے جس کے بعد صوبے میں کوروناوائرس سے متاثرہ افرادکی تعداد 405 تک پہنچ گئی۔

،  اعداد وشمار کے مطابق ڈی جی خان سے  207  زائرین، ملتان سے 19زائرین،103لاہور، گجرات 22، گوجرانوالہ 8،جہلم 19 اور راولپنڈی میں 12 ، ملتان میں 3، فیصل آباد3، منڈی بہاوالدین 1، ناروال 1، رحیم یار خان 1 اور سرگودھا میں 1 ، اٹک اور بہاولنگر میں بھی ایک ایک مریض اور میانوالی میں  2 مریضوں میں کرونا وائرس کی تصدیق ہوئی ہے جبکہ اب تک 3مریض کرونا وائرس سے جاں بحق ہوئے ہیں جن میں ۱ مریض راولپنڈی جبکہ 2 لاہور میں کرونا وائرس سے جاں بحق ہوئے ہے۔

ترجمان پرائمری اینڈ سکینڈری ہیلتھ کئیر نے کہا کہ تمام کنفرممریضوں کو دیگر افراد سے الگ آئسولیشن وارڈز میں رکھا گیا ہے اور طبیعت خراب ہونے پر مریضوں کو آئسولیشن وارڈز سے ہسپتال کے ایچ ڈی یو میں شفٹ کیا جاتا ہے جبکہ مریضوں کو مکمل طبی سہولیات فراہم کی جا رہی ہے۔

سندھ، پنجاب اور کے پی کے میں مزید 58 افراد میں کورونا وائرس کی تصدیق

ترجمان ہیلتھ کئیر نے یہ بھی کہا کہ عوام سے گزارش ہے کہ حفاظتی تدابیر اختیار کرکے خود کو محفوظ بنائیں اور گزشتہ 14 روز میں متاثرہ ممالک سے آئے افراد گھر میں آئسولیشن اختیار کریں۔

ترجمان پرائمری اینڈ سکینڈری ہیلتھ کئیر نے مزید کہا کہ متاثرہ ممالک سے آئے افراد میں آئسولیشن کے دوران علامات ظاہر ہوں تو 1033 پر رابطہ کریں، محکمہ صحت کی ریپڈ رسپانس ٹیمیں مشتبہ مریض کو ہسپتال منتقل کر کے ٹیسٹ کروایں گی۔