آئی جی پنجاب انعام غنی نے پولیس افسران کو ہدایات جاری کرتے ہوئے کہا ہے کہ ہر جرم کی ایف آئی آر ضرور درج کریں تا کہ ہمیں اصل کرائم کا پتہ چلے اور درکار وسائل کے بارے میں اندازہ ہو سکے۔

تفصیلات کے مطابق آئی جی پنجاب انعام غنی کی زیر صدارت سنٹرل پولیس آفس میں پہلی ویڈیولنک کانفرنس اور لاہور پولیس افسران کا اجلاس منعقد ہوا ہے جس میں انہوں نے لاہور موٹر وے واقعے پر اہم ہدایات جاری کی ہیں۔

آئی پنجاب کا کہنا تھا کہ کرپشن کا خاتمہ اور اختیارات سے تجاوز کرنیوالوں کے خلاف بلا تفریق کارروائی میری اولین ترجیحات میں ہے۔

  انعام غنی نے پولیس افسران کو ہدایات کی ہیں کہ عوامی مسائل کے حل کے لیے افسران اوپن ڈور پالیسی کے تحت دفاتر کے دروازے سب کے لیے کھلے رکھیں۔

انہوں نے کہا ہے کہ میرا فیورٹ کوئی نہیں ہے میرے نزدیک وہ ہوگا جو عوامی خدمت اور کارکردگی میں آگے ہو گا اور بہترین کارکردگی کا مظاہرہ کرنے والے افسران و اہلکاروں کی ہر سطح پر حوصلہ افزائی کا سلسلہ جاری رہے گا۔

لاہور موٹر وے واقعے کے حوالے سے بات چیت کرتے ہوئے آئی جی پنجاب کا کہنا تھا کہ موٹروے گجر پورہ میں خاتون کے ساتھ زیادتی میں ملوث ملزمان کوقانون کی گرفت میں لانے کے لیے کوئی کسر نہ چھوڑی جائے گی اور مستقبل میں اگر کوئی ایسا واقعہ ہوا تو علاقے کے ذمہ دار پولیس افسران کو جواب دہ ہونا پڑے گا۔