وفاقی وزیر تعلیم نے کہا ہے کہ اس سال کسی بچے کو امتحان کے بغیر پاس نہیں کیا جائے گا۔
تفصیلات کے مطابق نیشنل کمانڈ اینڈ آپریشن سینٹر (این سی او سی) کے اجلاس کے بعد میڈیا کو بریفنگ دیتے ہوئے وفاقی وزیر تعلیم شفقت محمود نے بتا یاکہ ملک بھرمیں تعلیمی ادارے18 جنوری سے مرحلہ وار کھولنے کا فیصلہ کیا گیا ہے۔
وزیرتعلیم نے بتایا کہ9،10،11 اور12 کلاسز کا تعلیمی سلسلہ 18 جنوری کو شروع ہوجائے گا۔
ان کا کہنا تھا کہ جن کلاسز کا آغاز25 جنوری کو ہونا تھا اب وہ یکم فروری سے شروع ہوں گی، ہائر ایجوکیشن کے تعلیمی ادارے بھی یکم فروری سے کھلیں گے۔
ذرائع کے مطابق وفاقی وزیر تعلیم شفقت محمود کی زیرصدارت وزرائے تعلیم اور وزرائے صحت کا اجلاس ہوا، جس میں کورونا کی موجودہ صورتحال کا جائزہ لیا گیا۔
اجلاس میں اسکول کھولنے سے متعلق صورتحال کا بھی تفصیلی جائزہ لیا گیا ۔
واضح رہےکہ گزشتہ اجلاس میں تعلیمی ادارے کھولنے کا فیصلہ کیا گیا تھا، فیصلہ ہوا تھا کہ18 جنوری کو نویں، دسویں، گیارویں اور بارہویں کے طلبہ تعلیمی اداروں میں جا سکیں گے۔
شفقت محمود کا اس سلسلے میں کہنا تھا کہ تعلیم کو جاری رکھنا چاہتے ہیں لیکن حتمی فیصلہ صحت کی بنیاد پر کیا جائے گا، طلبہ کی بہبود ہمیشہ اولین ترجیح ہو گی۔
یاد رہے کہ تعلیمی ادارے کورونا کے باعث نومبر میں بند کئے گئے تھے، دسمبر کے آخری ہفتے سے 10 جنوری 2021 تک تعلیمی اداروں میں موسم سرما کی تعطیلا ت کا اعلان کیا گیا تھا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News